SQO ákimdigi sýǵa aǵyp bara jatqan kópirge qatysty túsinik berdi

PETROPAVL. QazAqparat – Soltústik Qazaqstan oblysynda áleýmettik jelide qalqymaly kópirdiń seńge shydamaı, aǵyp bara jatqan vıdeosy jarııalandy. Osyǵan qatysty jergilikti ákimdik túsinik berdi, dep habarlaıdy QazAqparat tilshisi.

SQO turǵyndary áleýmettik jelide Esil ózeninde jaǵalaýdan ajyrap ketken qalqymaly kópirdiń vıdeosyn taratyp jatyr. Rolıkten turǵyndardyń ókinishin, bir-birin eskertip aıqaılaǵan daýysyn estýge bolady. Oqıǵa kýágeri appareldiń úzilip ketkenin aıtady.

Qalqymaly kópir eki eldi mekendi – Sokolovka men Bolshaıa malyshkany jalǵap tur. Ol 2021 jyly jóndelip, ornatylǵan edi. Eki aýyldyń turǵyndary úshin kópir asa mańyzdy. Sharýalar kópir arqyly jol qysqartyp, óz alqaptaryna tez jetedi. Sondaı-aq Bolshaıa malyshka eldi mekenindegi naýbaıhana kórshi aýyl turǵyndaryn nanmen qamtyp, osy kópir arqyly jetkizedi. Endi turǵyndarǵa kópirdi ornyna qoıǵansha Petropavl arqyly qatynaýǵa týra kelmek.

Qyzyljar aýdanynyń ákimdigi osy vıdeoǵa qatysty túsinik berdi. Ákimdik mamandarynyń aıtýynsha, rolıktegi jazba shyndyqqa janaspaıdy.

«10 sáýir kúni Esil ózeniniń sý deńgeıi kóterilýine baılanysty aýdandyq ákimdik jyldaǵydaı «Sokolovka – Bolshaıa malyshka» ponton kópirin jaǵalaýdan ýaqytsha ajyratý jumysyn atqardy. Bul jumys aldyn ala bekitilgen jospar boıynsha júrgizildi, ıaǵnı Sokolovka eldi mekeni jaǵynan irgetas blogyna bekitilgen apparelder alynyp tastaldy. Al Bolshaıa malyshka eldi mekeni jaǵynan avtokran qoldanyldy. Qazirgi ýaqytta bul kópir sý betinde qalqyp tur. Keıin jaǵaǵa qaıta bekitiletin bolady», - dedi aýdan ákimdiginen.