Sklıar apat kezindegi Bek Air pılottarynyń ózara áńgimesin jarııalady
«Áýe apaty ornynan borttyq jazba qurylǵysy tabyldy. Olar búlinbegen bolyp shyqty. Komıssııa sheshimimen atalǵan málimetterdi tirkeýshi qurylǵydan tıisti aqparatty alý úshin MAK-qa (memleketaralyq avıatsııalyq komıtet-avt.) joldandy», - dedi Roman Sklıar OKQ-da ótken baspasóz máslıhatynda.
Osydan keıin Memleketaralyq avıatsııalyq komıtet zerthanasy oqıǵanyń hronologııasyn qalpyna keltirgen.
«7 saǵat 20 mınýt 2 sekýndta ushý bastalǵan. 7 saǵat 20 mınýt 41 sekýndta 140 torapty (ýzel knot) jobalyq jyldamdyǵy boıynsha ekıpaj aldyńǵy shassıdi kótere bastaıdy. 7 saǵat 20 mınýt 45 sekýndta ushaqtyń ushý-qoný jolaǵynan aspaptyń bar jyldamdyǵymen (148 torapty - bul maksımaldy jyldamdyq) kóterildi», - dedi ol.
Roman Sklıardyń aıtýynsha, jerden kóterilgennen keıin ushaq sol jaqqa 5 gradýsqa, osydan keıin oń jaqqa 19 gradýsqa, qaıta solǵa 15 gradýsqa teńselip ketken.
«Ekıpaj ushý traektorııasynda áýe kemesin ustap qalmaq bolǵan. Teńselý saldarynan ushý-qoný jolaǵyna áýe kemesiniń shassıi men sol jaq qanaty tıgen. Qoldaǵy bar málimetke sáıkes, ekinshi ushqysh jerden kóterilgennen soń 10 sekýndtan keıin qozǵaltqyshtardyń jumys rejimin azaıtyp, ushýdy toqtatpaq bolǵan. Alaıda 4-5 sekýndtan keıin qozǵaltqyshtardyń jumys rejimi qaıtadan 93-95 paıyzǵa kóbeıtilip, ushý jalǵasqan», - dep túsindirdi Roman Sklıar.
Atalǵan jaǵdaı ushaq ekıpajanyń áńgimesimen rastalyp otyr.
«7 saǵat 20 mınýt 53 sekýndta ushaq oń jaqqa aýa bastaǵanda áýe kemesiniń komandıri «ne boldy?» deıdi. 7 saǵat 20 mınýt 54 sekýndta ekinshi pılot «Ne bolǵanyn bilmeımin? Stabılızator, toqtaımyz» degen. Osy birge balaǵat sóz aıtylady. Boljam boıynsha, osy kezde ekinshi pılot basqarý tetikterin kishi gazǵa aýystyrmaq bolǵan. 7 saǵat 20 mınýt 57 sekýndta komandır ekinshi pılottyń áreketine til qatyp, «kerek emes, ne istep jatyrsyń?» degen. Boljam boıynsha, osy kezde komandır basqarý tetikterin ushý rejimine aýystyrǵan. Bul kezde onyń «kettik, kettik» degen daýysy estiledi», - dedi Roman Sklıar.
Úkimet basshysynyń orynbasarynyń aıtýynsha, 7 saǵat 21 mınýt 4 sekýndta komandır «shassıdi jına» dep pármen bergen.
«Artynsha, ushaqtyń birneshe ret ushý-qoný jolaǵyna tııýi tirkelgen. Atap aıtqanda, ushaqtyń arty 6 ret, shassıdiń negizgi tireýishteri 4 ret, qanaty 1 ret tıgen», - deıdi ol.
7 saǵat 21 mınýt 15 sekýndta bes metrlik bıiktikte shassı jınala bastaǵan.
«Osydan keıin ushaqtyń tumsyǵy jerge tıip, áýe kemesi ushý-qoný jolaǵynan tys jerge syrǵyp ketken», - deıdi ol.
Eske sala ketsek, 2019 jyldyń 27 jeltoqsanynda Almatydan Nur-Sultan qalasyna ushyp shyqqan Bekeır kompanııasynyń ushaǵy radardan joǵalyp ketti. Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy. Ushaq jerge qulaǵan soń syrǵanap baryp áýejaı aýmaǵyna jaqyn tustaǵy aýyl shetindegi eki qabatty úıge soǵylǵan.