«SQ-Farmatsııanyń» jańa basshysy jemqorlyq táýekelderin túgel joıýy tıis - Shpekbaev

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev «SQ-Farmatsııa» jańa basshysyn jemqorlyq táýekelderin tolyǵymen joıýǵa shaqyrdy, dep habarlaıdy QazAqparat.

«Halyq koronavırýs jaǵdaıynyń kúrdelenýiniń negizgi sebepteriniń biri - sybaılas jemqorlyq, bıýrokratııa jáne jaýapsyzdyq dep sanaıdy. Áleýmettik jelilerdi muqııat qadaǵalaıtyn adamdar munymen kelisedi dep oılaımyn. Bul - ásirese, «SQ-Farmatsııanyń» laýazymdy tulǵalaryna, medıtsınalyq saqtandyrý qoryna, sondaı-aq jergilikti atqarýshy organdardyń birqatar medıtsına mekemelerine qatysty qylmystyq ister konteksinde ádil baǵa» dedi agenttik tóraǵasy alqa otyrysynda.

Sonymen qatar, Alık Shpekbaev «SQ-Farmatsııa» qyzmetindegi sybaılas jemqorlyq táýekelderine taldaýdy syrtqy sarapshylardy keńinen tarta otyryp, jedel júrgizý qajettigin atap ótti.

«Bizdiń taldaýymyzdyń sapasy osy uıymnyń bolashaqta qanshalyqty tıimdi qyzmet etetinine baılanysty bolady. Bul shara biryńǵaı dıstrıbıýtordiń jańa basshylyǵyn da kóbirek qyzyqtyrady dep oılaımyn. Sol úshin olar sybaılas jemqorlyq táýekelderin joıý men ashyqtyqty qamtamasyz etý boıynsha barlyq usynystardy oryndaıdy dep úmittenemin», dedi agenttik basshysy.