«SQ-Farmatsııa» koronavırýstyń ekinshi tolqynyna daıyn ba
Memleket basshysy bıylǵy Joldaýynda otandyq medıtsınany damytýǵa jáne osy saladaǵy ózekti máselelerdi sheshý jumystaryna qatysty naqty tapsyrmalar berdi. Saladaǵy problemalardy anyqtaý maqsatynda senatorlar dári-dármekpen jáne medıtsınalyq jabdyqtarmen qamtamasyz etýshi kásiporyndarǵa bardy.
SQ-Farmatsııa qoımalaryn aralaý kezinde kompanııanyń Basqarma tóraǵasy Erhat Esqalıev senatorlarǵa atqarylǵan jumystar týraly aqparatpen bólisti, josparlar men jobalar týraly aıtyp berdi.
Sondaı-aq, ol depýtattardyń elimizde indet órshigen maýsym, shilde aılarynda dári-dármektiń jetispeý sebepteri, osy baǵyttaǵy problemalardy sheshý joldary, aýrýhanalarǵa qajetti medıtsınalyq ónimderdi der kezinde jetkizý, baǵalar balansy týraly suraqtaryna jaýap berdi.
Odan bólek, SK-Farmatsııa koronovırýstyń ekinshi yqtımal tolqynyna daıyndyǵyn kórsetti. Senatorlar gýmanıtarlyq júktiń aımaqtarǵa jetkizilý máselesi, aýrýhanalardyń KVI men pnevmonııa dertine shaldyqqandardy emdeýge arnalǵan jabdyqtardyń túgeldigin surady.
Sonymen qatar Murat Baqtııaruly SQ-Farmatsııa JShS-nyń qoımalaryna qatysty máselege toqtalyp ótti. Senatordyń pikirinshe, qoımalardy jalǵa alý úlken bıýdjettik shyǵyndarǵa alyp keledi.
«Qoımalardyń kópshiligi, aımaqtardaǵy dári saqtaıtyn oryndar jalǵa alynady. Bul óte kóp qarajatty qajet etedi. Sondyqtan artyq shyǵynnyń aldyn alý úshin «SQ-Farmatsııanyń» óz qoımalary bolǵany durys. Óıtkeni ákimshilik shyǵyn úshin bir jylǵa 2 mıllıard teńge degen óte kóp» , - dedi senator.
Depýtattar jańadan ashylǵan ókpeni jasandy jeldetý statsıonarlyq apparattaryn qurastyratyn «Qazaqstan Aselsan ınjınırıng» kásipornyna jáne bas qaladaǵy dárihanalarǵa bardy. Jasandy jeldetý apparattaryn qurastyratyn kásiporynda Senat depýtattary jańa qondyrǵylardyń sapasyna jáne olardy taratý jumystaryna basa mán berdi.
Nur-Sultan qalasynda ornalasqan dárihanalardy aralaý kezinde senatorlar dári-dármek qoryna, turǵyndarǵa kórsetiletin qyzmet sapasyna, karantın erejeleriniń saqtalýyna erekshe nazar aýdaryp, kelýshilermen jáne medıtsınalyq qyzmetkerlermen suhbat qurdy.
Bul sharaǵa Senattyń Áleýmettik-mádenı damý jáne ǵylym komıtetiniń músheleri Murat Baqtııaruly, Baqytjan Jumaǵulov, Nurtóre Júsip, Dınar Nóketaeva, Aqmaral Álnazarova, Aıgúl Qapbarova jáne Altynbek Nuhuly, sondaı-aq, densaýlyq saqtaý mınıstrliginiń vıtse- mınıstri Lıýdmıla Bıýrabekova, Indýstrııa jáne ınfraqurylymdyq damý mınıstrliginiń vıtse mınıstri Talǵat Janjúmenov qatysty.
Aıta keteıik, 10 qyrkúıekte ótken Senat otyrysynda Áleýmettik-mádenı damý jáne ǵylym komıtetiniń tóraǵasy Murat Baqtııaruly Úkimet basshysynyń atyna depýtattyq saýal joldap, otandyq medıtsınadaǵy negizgi máselelerdi naqty atap kórsetken edi.
Depýtat óz saýalynda:
« Emdeý oryndarynda 4 myń dáriger-reanımatolog, rentgenolog, pýlmonolog jáne osy sekildi sala mamandarynyń tapshylyǵy qatty bilinedi. Іri ortalyqtardaǵy jáne óńirlerdegi aýrýhanalar men emhanalarda 800-den astam ınfektsıonıstiń orny bos tur. «Dıplommen – aýylǵa» baǵdarlamasymen 2018 jyly aýyldyq jerlerge barǵan 706 (15%) jas mamannyń tek 355-ine ǵana (50%) kóterme aqy tólengen, 102 dárigerge turǵyn úı buıyrdy. Qazirde dáriger kadrlarymen qamtamasyz etý qalada 56,8% bolsa, aýylda bul kórsetkish 16,1% quraıdy «, - dedi.