«SK-Farmatsııa» 2016 jylǵa arnalǵan dári-dármekterdiń jetkizilimin aıaqtady
«Jalpy 2016 jyly «SK-Farmatsııa» JShS elimizdiń 1115 medıtsınalyq uıymyna 114 mlrd. teńgeniń dárilik quraldary men medıtsınalyq maqsattaǵy buıymdardyń 958 ataýly birligin jetkizdi», - dep jazady QR Densaýlyq saqtaý jáne áleýmettik damý mınıstrligi.
Onyń ishinde uzaqmerzimdi kelisimsharttar boıynsha, otandyq óndirýshilerden 25,2 mlrd. teńgege dárilik zattar satyp alynǵan. Qazaqstanda balamasy joq, shetelden jetkizilgen dári-dármekterge jalpy 16,7 mlrd. teńge jumsalǵan. Tender arqyly 71,9 mlrd. teńge bolatyn dárilik zattar satyp alyndy.
Sonymen qatar únemdelgen bıýdjettik qarajat kólemi 5,4 mlrd. teńge kóleminde tirkelip otyr. Biryńǵaı dıstrıbıýter jumys istep jatqan 7 jylda bıýdjettiń 41,9 mlrd. teńge qarjysy únemdelgen. Alǵash ret bıyl «SK-Farmatsııa» 2017 jylǵa arnalǵan tenderdi merziminen buryn, aldyn ala ótkizip otyr. Jetkizýshilermen 90 paıyz ónimge qatysty kelisimshart jasaldy. 2017 jylǵa arnalǵan dárilik zattardyń alǵashqy jetkizilimin kompanııa bıyl jeltoqsan aıynan bastaýǵa daıyn.
Eske salaıyq, bunyń aldynda, QR Premer-Mınıstri Baqytjan Saǵyntaev 8 qarashada ótken Úkimet otyrysynda «SK-Farmatsııa» kompanııasynyń jumysyn synǵa alǵan bolatyn.
«Barlyq jumysty qaıta uıymdastyrý qajet - olar úzdiksiz, qateliksiz jumys jasaýy kerek, dáriler árbir naýqasqa ýaqytyly jetip otyrýy kerek. Memleket tarapynan tıisti qarajat bólinip jatyr. Biz otandyq bızneske zamanaýı farmzaýyttardy salýǵa jaǵdaılar jasadyq. Qazir shetel naryqtaryna da shyǵyp jatyrmyz, dárilerimiz GMP standarttaryna sáıkes keledi. Bizde barlyǵy bar deýge bolady, degenmen sheteldik dárilik zattarmen problema shyǵyp jatyr», - dep atap ótti Premer-Mınıstr.