Sizderge qarapaıym halyq fýtbol oınaı alatyn shaǵyn alańdar kóbirek kerek - FIFA prezıdenti

ASTANA. QazAqparat – Halyqaralyq fýtbol federatsııasynyń (FIFA) prezıdenti Djannı Infantıno BAQ ókilderimen ótken baspasóz konferentsııasynda Qazaqstandaǵy fýtbol ınfraqurylymy týraly pikir bildirdi, dep habarlaıdy QazAqparat tilshisi.

«Qazaqstan fýtbolyndaǵy negizgi máseleniń biri – oıyn alańdarynyń ınfraqurylymy. Qazaqstan fýtbol federatsııasy basshylyǵymen osy máseleni talqyladyńyzdar ma? Óz tarapyńyzdan qandaı usynym-keńester aıttyńyz?» - dep surady BAQ ókili.

Djannı Infantınonyń aıtýynsha, ınfraqurylym máselesi búkil álemde ózekti.

«Neǵurlym kóbirek alań salý kerektigin aıttym. Shynymen de solaı. Qazaqstanda ǵana emes, álemniń basqa elderinde de ınfraqurylym degen óte mańyzdy másele. Fýtbol – óte qarapaıym sport túri. Dop pen alań bolsa jetip tur. Alań bolmasa da fýtbol oınaýǵa bolady. Biraq alańda oınaǵanǵa ne jetsin?! Fýtbol ınfraqurylymyna ınvestıtsııa salýdyń mańyzy óte zor. FIFA turǵysynan aıtsaq, bizde «FIFA búkil álem úshin» degen baǵdarlamamyz bar. Ol baǵdarlama álemdegi búkil fýtbol qaýymdastyqtaryna kómektesýdi kózdeıdi. Bıýdjetimiz – 8 mln dollar. Túrli jobalarǵa, ınfraqurylymǵa arnalǵan. Biz Qazaqstan fýtbol federatsııasymen jańa oıyn alańdarynyń máselesin, Talǵardaǵy fýtbol ortalyǵyn talqyladyq. Federatsııaǵa fýtbol alańdarynyń birine álemdegi eń uly fýtbolshylardyń biri — Peleniń atyn bergeni úshin alǵys aıtyp, quttyqtaǵym keledi», - dedi FIFA prezıdenti.

Sondaı-aq, ol fýtbol ınfraqurylymy máselesin Prezıdent Qasym-Jomart Toqaevpen de talqylaǵanyn atap ótti.

«Qazaqstan FIFA týrnırlerin, jasóspirimder arasynda álem chemıponatyn, 17, 20-jasqa deıingi jastar arasynda álem birinshilikterin ótkizýge nıettense, áýeli ınfraqurylym ózgerýi kerek ekeni anyq másele.

Stadıondar kóbirek bolǵany kerek. Astanadaǵy stadıon óte ádemi. Biraq ol tóbesi jabylatyn jalǵyz stadıon. Bizge kóbirek stadıon kerek jáne onyń bári orasan úlken bolýy mindetti emes. Bizge shaǵyndaý bolsa da, jastar, ózge adamdar kóbirek oınaı alatyn stadıondardyń kóp bolǵany mańyzdy.

Qazaqstan fýtbol federatsııasynyń, el Prezıdentiniń fýtbol ınfraqurylymyna ınvestıtsııa salýǵa degen yntasy kúshti. Óıtkeni fýtbol ınfraqurylymyna salǵan aqsha – Qazaqstan halqyna, jastaryna salynǵan ınvestıtsııa. FIFA-ǵa da osy ispen aınalysý kerek. Biz de óz úlesimizdi qosyp jatyrmyz, Qazaqstan da óz úlesip qosyp jatyr. Keleshekte balalardyń oınaýyna arnalǵan fýtbol alańdary men alańqaılary kóp bolatynyna senimdimin. Qazaqstan úshin kún sýyq kezeńde de fýtbol oınaýǵa múmkindik beretin tóbesi jabylatyn arenalardyń bolǵany óte mańyzdy. Osy baǵytta jumys istep jatyrmyz», - dedi Djannı Infontıno.