Sizderdiń erlikterińiz teńdessiz erjúrektik pen batyldyqtyń ónegesi bolyp qalady - OQO
Bul týraly oblys ákimi Asqar Myrzahmetov pen oblystyq máslıhattyń hatshysy Qudaıbergen Erjannyń Uly Jeńis merekesine oraı Uly Otan soǵysy men tyl ardagerlerine joldaǵan quttyqtaýynda aıtylǵan.
«Qurmetti ardagerler men tyl eńbekkerleri! Uly Jeńis merekesine oraı shyn júrpekten shyqqan quttyqtaýymyzdy qabyl alyńyzdar. Biz búgingi ashyq aspan úshin tereń qurmetimiz ben alǵysymyzdy bildiremiz. Sizder Otanǵa búkil álemge qaltqysyz qyzmet etýdiń úlgisin kórsettińizder. Sizderdiń esimderińiz ulttyq jáne álemdik tarıh shejiresine altyn áriptermen jazyldy. Sizderge uzaq ǵumyr, densaýlyq, sergektik pen jan shýaǵyn tileımiz! Bizdiń respýblıkamyz odan ári gúldene túsip, ár otbasynda tynyshtyq pen bereke ornasyn!», - delingen quttyqtaýda.
Ońtústik Qazaqstannan maıdanǵa 140 myń adam attandy, olardyń jartysy urys dalasynan oralmady. 51 ońtústikqazaqstandyq Keńes Odaǵynyń Batyry, 5 adam «Dańq» ordenderiniń tolyq ıegeri atandy. Olardyń esimderi Shymkenttegi Dańk memorıalynda máńgilikke qashap jazylǵan.
Mereke qarsańyndaǵy bul kúnderi uly shaıqastardyń qatysýshylaryna ártúrli uıymdar qurmet kórsetýde. Aıtalyq, Shymkent ákimdigi men qalanyń qoǵamdyq uıymdary ardagerlerge merekelik dastarqan jaıyp, árqaısysyna syılyqtar tapsyrdy. Jastar uıymdarynyń ondaǵan belsendileri bul kúnderi ardagerlerge úı sharýasyna qolqabys etýde. Jigitter men qyzdar soǵys erleriniń úıleri men páterlerin retke keltirip, aýlalardy jınastyrdy. Buǵan ulttyq mádenı ortalyqtar ókilderi de óz úlesterin qosty. Máselen, tatar-bashqurt ortalyǵy ardagerlerge arnap kontsert qoıdy. Oǵan ardagerler halyqtyq hory, «Zamandashlar» ansambli, balalar ujymdary qatysty.
9 mamyrǵa aýqymdy sharalar josparlanyp otyr. Mereke saltanaty «Máńgi óshpes polk» sherýimen bastalady. Shymkenttiń júzdegen turǵyny ortalyq stadıon janyndaǵy alańǵa ózderiniń Uly otan soǵysy kezinde shaıqasqan týystarynyń fotosýretterin alyp shyǵady. Olar sýretterdi qolyna ustap, qala kóshesimen Dańq memorıalyna deıin júrip ótedi. Onda saltanatty mıtıngi ótip, odan keıin maıdangerler men tyl ardagerlerine dástúrli sarbaz botqasy usynylady.