Sırııalyq Oskar úmitkerine AQSh-qa kirýge ruqsat berilmedi

ASTANA. QazAqparat - «Oskar» baıqaýyna usynylǵan «Aq dýlyǵalylar» atty gýmanıtarlyq uıym týraly túsirilgen fılmniń sırııalyq operatory Haled Hatıbke AQSh aýmaǵyna enýine ruqsat berilmedi, dep habarlaıdy Bı-Bı-Sı agenttigi.

Assoshıeıted press agenttiginiń habarlaýynsha, buǵan deıin 21 jastaǵy operatorǵa amerıkalyq vıza berilgen, biraq Ystanbuldan Los-Andjeleske ushatyn «Turkish Airlines» áýe kompanııasynyń ushaǵyna otyrýǵa ruqsat berilmegen.

Agenttik derekterine sáıkes, AQSh ishki qaýipsizdik mınıstrligi operatorǵa qatysty qandaı da bir «jaısyz aqparat» estip,  Hatıbti el aýmaǵyna kirgizýden sońǵy sátte bas tartqan. Assoshıeıted presstiń jazýynsha, munyń astarynda lańkestermen baılanystan bastap, qarapaıym vızalyq rejımdi buzýǵa deıin túrli sebepter bolýy múmkin.

«Qurama Shtattarǵa barý úshin qoldanystaǵy jol júrý qujattary bolýy tıis», - dedi resmı túsinikteme bergen ishki qaýipsizdik mınıstrliginiń ókili Jıllıan Krıstınsen.

Oqıǵa AQSh prezıdenti Donald Tramptyń ıslam dinin ustanatyndar kóp shoǵyrlanǵan jeti memlekettiń azamattaryna elge kelýge tyıym salatyn jarlyqqa qol qoıýynan týyndap otyr.

Netflix túsirgen «Aq dýlyǵalylar» lentasy «Úzdik qysqametrajdy derekti fılm» nomınatsııasy boıynsha «Oskarǵa» qatystyrylýda.

40-mınýttyq  lentada Túrkııadaǵy oqytý ortalyǵynan Sırııaǵa, bomba astynda qalǵan turǵyndardy qutqarýǵa attanǵan uıymnyń úsh eriktisi jaıly baıandalady.