Sırııalyq kóterilisshiler eldiń shyǵysyndaǵy iri qalany baqylaýǵa aldy

<p>ASTANA. KAZINFORM &ndash; Sırııa úkimetin qulatqan kóterilisshiler eldiń shyǵysyndaǵy kúrdter basqaratyn jáne AQSh qoldaý kórsetetin &laquo;Sırııanyń demokratııalyq kúshteri&raquo; alıansymen bolǵan shaıqastan keıin shyǵystaǵy Deır-ez-Zor qalasyn baqylaýǵa alǵanyn málimdedi.</p>

«Haııat Tahrır ash-Sham» (HTSh – Qazaqstanda tyıym salynǵan uıym – red. eskert.) tobynyń aǵa qolbasshysy Hasan Abdýl-Ganı Sırııa oppozıtsııasynyń kúshteri Deır-ez-Zor qalasy men áskerı aerodromdy tolyq baqylaýǵa alǵanyn aıtty.

Sondaı-aq, jaqyn mańdaǵy strategııalyq mańyzy bar ál-Býkamal qalasynyń da oppozıtsııalyq kúshterdiń qolyna ótkeni habarlandy.

– Biz Rakka, Hasaka jáne Sırııanyń shyǵysyndaǵy basqa aýdandarǵa qaraı ilgerileımiz, – deıdi HTSh jaýyngerleri.

Sondaı-aq, seısenbi kúni SDK quramyndaǵy «Deır-ez-Zor áskerı keńesi» koalıtsııadan shyǵatynyn jarııalaǵan.

Sırııa demokratııalyq kúshteri (SDK) – 2015 jyldyń qazan aıynda qurylǵan Sırııada áreket etetin qarýly toptardyń alıansy. SDK kúrd, arab, assırııalyq jáne basqa da etnıkalyq jáne dinı toptardan turady jáne onyń negizgi bóligi – kúrdterdiń «Halyqtyq qorǵanys otrıady» (YPG). Túrkııa YPG-di  terror uıymy dep sanaıdy.

Osyǵan deıin Izraıldiń Sırııaǵa shabýyldy kúsheıtkenin jazdyq.