Sırııadan oralǵan áıeldiń lańkesterge qatysy bar-joǵy tekseriledi - Bas prokýratýra
Eske salaıyq, Astanada zań ǵylymynyń doktory, professor Qalaýsha Begalıevtiń 90 jyldyq mereıtoıyna arnalǵan halyqaralyq konferentsııa ótýde. BAQ ókilderi sharaǵa qatysqan QR Bas prokýrorynyń orynbasaryna sharadan tys birqatar suraq qoıdy.
«Sırııadan 4 balasy bar áıel elge oralǵan bolatyn. Onyń terrorıstermen baılanysy bar-joǵyna tekserý júrip jatyr ma?», - dep surady tilshiler.
Osyǵan oraı Andreı Lýkın ol áıeldiń mindetti túrde tekserýden ótetindigin aıtty.
«Bizdiń arnaıy qyzmetterimiz týyndaıtyn qaterdiń aldyn alý úshin sáıkesinshe jumystar júrgizýdi kózdeıdi. Sizderdiń saýaldaryńyzǵa jaýap berer bolsam, arnaıy qyzmetterimiz mindetti túrde olardyń janjaldar aımaǵyna, onyń ishinde Sırııaǵa ótýiniń shynaıy sebebin anyqtaý úshin sáıkesinshe sharalar júrgizedi. Azamattarymyzdyń munan ary da soǵys oshaqtaryna ketýine jol bermeý mańyzdy máselelerdiń biri», - dedi ol.
Onyń aıtýynsha, janjal aımaǵynda júrgen otandastarymyz elge oralýǵa nıet bildirip, jazbasha ótinish jasaıtyn bolsa, onda memleket qoldan kelgen sharalar qabyldaıtyn bolady.
Esterińizge sala ketsek, 14 qarasha kúni QR Syrtqy ister mınıstrligi baspasóz qyzmetiniń jetekshisi Ánýar Jaınaqov Sırııanyń janjal aımaǵynan shyǵarylǵan Qazaqstan azamattary taıaý kúnderi elge jetkiziletindigin aıtqan edi.
«Ózderińizde biletindeı, keshe Sheshen Respýblıkasynyń astanasy Groznyı qalasyna Sırııada janjal bolyp jatqan aımaqtan qutqarylǵan bir top adam jetkizildi. Olardyń arasynda Qazaqstan azamattary da boldy. Ol 1988 jyly dúnıege kelgen Oral qalasynyń turǵyny men onyń kámelettik jasqa tolmaǵan 4 balasy. Olardy Groznyı áýejaıynda Qazaqstannyń Reseıdegi Elshiliginiń qyzmetkerleri kútip aldy. Jaqyn arada olar Qazaqstanǵa jetkiziletin bolady», - degen edi ol.
Foto nurotan.kz