Sırııadan kelgen qazaqstandyqtar radıkaldy kózqaras ustanyp júr - UKK
"Ózderińiz jaqsy bilesizder, xalyqaralyq terrorıstik uıymdar Sırııa men Irakta jeńilis tapty. Sondyqtan ondaǵy sodyrlar otbasylarymen birge basqa jerge, sonyń ishinde óz elderine qonys aýdarýda. Mysaly, qazirgi kezde Qazaqstanǵa 125 azamat qaıta oralyp, olardyń 57-si sottaldy, qalǵandary baqylaýda. Bul jerde nazar aýdaratyn mańyzdy másele, qaıtyp kelgender radıkaldyq kózqarasty ustanýda. Olarmen profılaktıka men beıimdeý jumystary júrgizilýde", - dedi QR Ulttyq qaýipsizdik komıteti tóraǵasynyń orynbasary Nurǵalı Bilisbekov.
Onyń aıtýynsha, ekstremızm men terrorızmdi nasıxattaý qarqyny qazaqstandyq qoǵamda radıkaldanýǵa sebepshi bolatyndaı joǵary deńgeıde saqtalýda. "Sondyqtan osy jáne basqa da faktorlar terrorızm men dinı ekstremızmge qarsy memlekettik kúres júıesin odan ary damytý qajettigin kórsetip otyr", - dep atap kórsetti N.Bilisbekov.
Aıta keteıik, Úkimettiń búgingi otyrysynda QR Ulttyq qaýipsizdik komıteti terrorızmge qarsy kúreske arnalǵan besjyldyq baǵdarlamany tanystyrdy. Mınıstrler kabıneti atalǵan qujatty maquldady.
foto: katehon.com