Sırııadan qaıtarylǵan qazaqstandyq kelinshek: 19 ret kúıeýge shyqqandar boldy
«Kúıeýi qaıtys bolǵan áıeldi bir úıge alyp keledi. Ol jerde tazalyq, tamaq, jaryq joq, ıaǵnı eshqandaı jaǵdaı jasalmaǵan. Amal joq basqa kúıeýge shyǵýǵa májbúr bolasyń. Sebebi osy qıyndyqtardy áıelder amalsyzdan kúıeýge shyǵýy úshin ádeıi jasap qoıǵan. Kúıeýge shyqpasań, sol jerde ashtan ólesiń. Al kúıeýge shyqqanymen, ol adam 2-3 kúnnen keıin qaıtys bolý múmkin. Osyndaı jaǵdaıdyń saldarynan 5-6 ret, tipti 19 ret kúıeýge shyǵyp jatqan áıelder boldy», - dedi ol QR Syrtqy ister mınıstrliginde ótken brıfınge.
Onyń sózine qaraǵanda, áıelderdiń kúıeýi mert bolsa, oǵan tıesili aqshasyn da bermeıdi. Kúıeýi bolǵanda tamaqqa dep aqsha berip turady eken. Densaýlyǵyna baılanysty syrtqattanyp qalsa da, er azamatsyz úıden tys aýmaqqa shyǵýǵa tyıym salynǵan.
Budan buryn habarlanǵandaı, jaqynda Sırııadan 231 Qazaqstan azamatynyń elge jetkizilýine baılanysty QR Prezıdenti Qasym-Jomart Toqaev málimdeme jasady.
«Meniń tapsyrmam boıynsha 7 jáne 9 mamyr kúnderi Sırııadan 231 Qazaqstan azamaty elge jetkizildi, onyń 156-sy - balalar, deni mektep jasyna deıingiler, sonyń ishinde 18-i - jetim balalar. Bul aýqymdy gýmanıtarlyq aktsııa - Tuńǵysh Prezıdent - Elbasy Nursultan Nazarbaevtyń tapsyrmasymen bıyl qańtar aıynda júrgizilgen «Jýsan» operatsııasynyń jalǵasy», - delingen Memleket basshysynyń málimdemesinde.
Belgili bolǵandaı, Qazaqstanǵa kelgennen keıin 16 er adam men 4 áıel DAISh jaǵynda terrorıstik is-áreketke qatysy bar degen kúdikpen tutqynǵa alyndy.
Eske salsaq, bıyl qańtarda Elbasy Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasady.