Sırııadan qaıtarylǵan azamattardan qaýip bar ma - UQK jaýaby
«Árıne, osy operatsııa birneshe aı boıy júrgizildi. Óte kóp qıynshylyq boldy. Álbette, jan-jaqty máseleler tolyqqandy tekserildi, talqylandy. Kóp adamdar lańkestik turǵysynan «qaıtarylǵan azamattar jaǵynan qandaı da bir qaýip bar ma?» dep suraq qoıady. Taǵy da aıtaıyn, ol jaǵynan bári de tekserildi. Qazirgi tańda qaıtarylǵan azamattardyń ishindegi 6 er kisi jáne 1 áıeldiń ústinen qylmystyq ister qozǵaldy. Osylar jáne qaıtarylǵan basqa azamattar terrorıstik áreketter turǵysynan tolyǵymen tekseriledi. Eger ondaı jaǵdaı dáleldense, árıne, qylmystyq jaýapkershilikke tartylady», - dedi Baqytbek Rahymberdıev.
Departament basshysy atap ótkendeı, Sırııa, Irak, Aýǵanstan aımaqtarynda qaqtyǵystar birneshe jylǵa jalǵasýda.
«Qaqtyǵys aýmaqtarynan qaıtarylǵan barlyq qazaqstandyqtardyń 40 paıyzǵa jýyǵy qylmystyq jaýapkershilikke tartyldy. Qalǵandaryna aldyn alý, ońaltý sharalary júrgizilgen. Sol úshin kópshilik ol týrasynda kóp bile bermeýi múmkin. Biraq, bizdiń oıymyzsha, qaıtarylǵan azamattardan ázirshe eshqandaı terrorıstik qaýip joq. Bul rette, eń basty másele - kishkentaı balalardy qaıtarý boldy. Óıtkeni, qaıtarylǵandardyń basym kópshiligi - 1-5 jas aralyǵyndaǵy balalar», - dedi ol.
Eske sala ketsek, keshe Memleket basshysy Nursultan Nazarbaev Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasaǵan bolatyn. Memleket basshysy atap ótkendeı, 6 qańtarda quqyqqorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan Qazaqstannyń 47 azamaty, sonyń ishinde 30 bala elge qaıtaryldy.
Sonymen birge, búgingi baspasóz máslıhatynda QR Syrtqy ister vıtse-mınıstri Erjan Ashyqbaev «Jýsan» operatsııasynan keıin de qaqtyǵys aımaqtarynda júrgen qazaqstandyqtardy Otanyna qaıtarý jumystary jalǵasatynyn málim etken bolatyn.