Sırııadaǵy jer silkinisinde úıindi astynan qutqarylǵan náresteniń qazirgi jaǵdaıy qalaı

DJINDAIRIS. QazAqparat – Qutqarýshylar osy jyldyń aqpanynda qıraǵan úıdiń úıindileri arasynan qutqarǵan jańa týǵan náreste Afranyń ǵajaıyp oqıǵasy álemdegi kóptegen adamnyń júreginen jol tapty. Sábı úıindi astynda dúnıege kelip, balasyn ómirge ákelgen boıda qaza tapqan anasynan kindigi de ajyramaǵan bolatyn. Ol sábıdiń qazir qaıda ekenin QazAqparat materıalynan oqı alasyzdar.

Afra qazir alty aılyq jáne ol – erekshe baqytty jáne deni saý sábı.

BBC News málimetinshe, ony apasy men kókesi óziniń jeti balasymen birge Sırııanyń Djındaırıs qalasynda tárbıelep jatyr.

Kókesi Halıl al-Savadıdiń aıtýynsha, sábı áli kip-kishkentaı, biraq qazirdiń ózinde ákesin eske salady, ásirese kúlkisi uqsaıdy.

6 aqpanda Túrkııanyń ońtústik-shyǵysynda jáne Sırııanyń soltústiginde 44 myńnan astam adam qaza tapqan joıqyn jer silkinisi boldy. Djındaırıstegi joıqyn jer silkinisinen keıin birden Afranyń anasy tolǵata bastaǵan, al qyz úıiniń qıraǵan úıindileri astynda dúnıege keldi. Sábıdiń anasy, ókinishke qaraı, qutqarýshylar olardy tapqanǵa deıin qaıtys bolǵan.

QazAqparat sábıdiń otbasy músheleri arasynda jalǵyz ózi tiri qalǵanyn habarlaǵan bolatyn. Onyń ákesi, tórt aǵasy men ápkesi anasymen birge qaza tapqan.

Afranyń qutqarylǵan vıdeosy áleýmettik jelide jarııalanyp, tez tarady. Sábıdi aýrýhanaǵa jetkizip, oǵan Aıa esimin bergen.

Bul arab tilinen aýdarǵanda «ǵajap» degen maǵynan bildiredi.

Aýrýhanaǵa túskende qyzdyń denesi kedir-budyr jáne kógerip qalǵan edi, al tynys alý joldarynda úıindi shańynyń saldarynan problema bolǵan. Al, qazir qyzdyń densaýlyǵy 100% jaqsy.

Afraa aýrýhanada jatqanda álemdegi myńdaǵan adam asyrap alýdy usynǵan, sondyqtan Halıl men onyń jubaıy Hala ózderiniń týys ekenin dáleldeýine týra keldi. Hala DNQ testin tapsyryp, 10 kún kútti.

Afranyń oqıǵasy báriniń qyzyǵýshylyǵyn týdyrǵandyqtan, Halıl men onyń otbasy qyzdy bireý urlap áketip qalady dep alańdaǵan. Olar aýrýhana ǵımaratynan shyqpaı, qyzdy kúni-túni kúzetken.

DNQ analız nátıjesi Halanyń týys ekenin rastady – ol Afranyń ákesiniń ápkesi. Qyzdy aýrýhanadan shyǵaryp alyp, oǵan anasynyń qurmetine Afraa degen esim bergen.

Halıl Afraa óskende oǵan ne bolǵanyn aıtyp, otbasynyń sýretterin kórsetýge ýáde berdi.

Qazir otbasy úı jaldap turady, sebebi olardyń úıi jer silkinisinen keıin qaýipti.

Bireý onyń otbasyna BAÁ-ge nemese Ulybrıtanııaǵa kóshýge kómek usynǵan, biraq Halıl bas tartqan.

«Shynymdy aıtsam, men áli Afrany áketip qalady dep alańdaımyn», - deıdi Halıl.

BUU málimetinshe, Sırııanyń soltústik-batysynda aqpanda bolǵan jer silkinisinen 4500-ge jýyq adam qaza tapqan.