Sırııadaǵy ahýal boıynsha Qazaqstandaǵy kelissózder nátıjeli boldy - Iran Prezıdenti
Saltanatty shara Iran Prezıdentiniń Saraıynda ótti. Onyń barysynda eki el arasyndaǵy ekijaqty jáne kópjaqty formattaǵy ózara tıimdi yntymaqtastyqtyń qazirgi jaǵdaıy men ony jandandyrý máseleleri talqylandy.
Elshi A. Orazbaı Iran Prezıdentin Elbasymyzdyń bastamasymen Qazaqstannyń saıası ári ekonomıkalyq órkendeýi, halqymyzdyń ál-aýqatyn arttyrý, sondaı-aq álemde beıbitshilikti nyǵaıtý baǵytynda atqarylyp jatqan mańyzdy sharalarmen tanystyrdy. Oǵan qosa, eki memleket arasyndaǵy saýda-ekonomıkalyq, ınvestıtsııalyq jáne mádenı baılanystardy odan ári damytý boıynsha pikirlerimen bólisti.
Óz kezeginde, H. Rýhanı Iran Qazaqstannyń táýelsizdigin birinshi moıyndaǵan memleketter qatarynda bolǵanyn jáne osy ýaqyttan beri ekijaqty yntymaqtastyq dostyq sıpatta damyp kele jatqanyn málimdedi. Sondaı-aq Qazaqstan Prezıdenti Nursultan Nazarbaevpen óziniń ornatqan tyǵyz baılanysy ekijaqty jáne aımaqtyq máseleler boıynsha jaqsy yqpaldastyq jasaýǵa múmkindik berip otyrǵanyn aıtty.
IIR Prezıdenti elimizdiń syrtqy saıasattaǵy bastamalary aımaqtyq jáne halyqaralyq qaýipsizdikti saqtaýǵa erekshe úles qosyp otyrǵanyn, onyń aıasynda Irannyń ıadrolyq baǵdarlamasy tóńiregindegi máseleni sheshý jáne Sırııadaǵy janjaldy retteý boıynsha Qazaqstanda ótken kelissózderdiń nátıjeli bolǵanyn atap ótti.
H. Rýhanı ekijaqty yntymaqtastyqtyń áleýeti zor ekendigin, Qazaqstan men Iran Kaspıı teńizi arqyly tikeleı jáne Túrikmenstan arqyly temir-avto joldarmen baılanys jasaı alatynyn aıtty. Osy oraıda, kólik-tranzıt jáne aýyl sharýashylyǵy salalaryndaǵy yntymaqtastyqty jandandyrý eki elge de tıimdi bolatynyn habarlady.
Oǵan qosa, tarıhı jáne mádenı baılanystar qazir de óz jalǵasyn taýyp otyrǵanyn, onyń aıqyn mysaly retinde Naýryz merekesin keltirdi.
IIR Prezıdenti H. Rýhanı N. Nazarbaevqa dostyq jyly sálemin joldady jáne Qazaqstan Prezıdentin Iranda saparmen kelýin kútetinin málimdedi.