Sırııada zilzaladan qaza tapqandar sany 237 adamǵa jetti

BEIRÝT. TASS - QazAqparat – Sırııada jer silkinisinen qaza tapqandar sany 237 adamǵa jetti. Bul týraly QazAqparat TASS agenttigine silteme jasap habarlaıdy.

Málimetke sáıkes, kem degende 639 adam zardap shekken. Qaza tapqandar men zardap shekkenderdiń kópshiligi Latakııa, Aleppo, Hama jáne Tartýs provıntsııalarynda tirkelgeni atap ótildi. Buǵan deıin sırııalyq BAQ 111 adam qaza tapqanyn habarlaǵan bolatyn.
Sırııanyń Damask baqylaýyna alynbaǵan aýdandarynda qurbandar, zardap shekkender men qıraǵan ǵımarattar týraly aqparat joq.
Óz kezeginde, SANA agenttiginiń habarlaýynsha, respýblıkanyń qorǵanys mınıstrligi «jer silkinisi saldarynan zardap shekken halyqqa jedel kómek kórsetý, úıindiler astynda qalǵan adamdardy izdeý jáne alyp shyǵý úshin eldiń barlyq provıntsııalaryndaǵy quramalaryn jáne [vedomstvolyq baǵynysty] qurylymdaryn jumyldyrýda».
Arab Respýblıkasy Densaýlyq saqtaý mınıstriniń kómekshisi Ahmed Dýmeırııa atap ótkendeı, «bul áli naqty san emes jáne qutqarý jumystary jalǵasqan saıyn qurbandar sany artýy yqtımal».
Óz kezeginde Sırııanyń Kólik mınıstrligi eldiń soltústik aımaqtarynda temirjol baılanysynyń toqtatylǵanyn habarlady.
«Joldar men kópir qurylymdarynyń yqtımal zaqymdanýyn eskere otyryp, saqtyq sharasy retinde poıyz qozǵalysy toqtatyldy», - delingen vedomstvo málimdemesinde.
Al Hadath málimetinshe, ondaǵan adam Aleppo, Idlıb, Latakııa jáne Hama provıntsııalarynda qıraǵan ǵımarattardyń astynda qalyp qoıǵan. Qutqarý jumystary qatty jańbyrǵa qaramastan jalǵasyp jatyr.

Eske salaıyq, Túrkııanyń ońtústik-shyǵysynda 7,4 magnıtýdasyna deıin úsh ret jer silkindi. 7,4 baldyq eń qýatty jerasty dúmpýi Kahramanmarash provıntsııasyndaǵy Pazardjık aýdanynda jergilikti ýaqyt boıynsha 04:17-de, 7 km tereńdikte boldy. Sodan keıin ártúrli aımaqtarda - Adana, Ankara, Antalıa, Gazıantep, Kaıserı, Mersın, Trabzon, Ýrfada jer silkingen.
Qaza tapqandar men zardap shekkender týraly aqparat tolyqtyrylyp jatyr.Sońǵy málimetke sáıkes, qaza bolǵandar sany 76-ǵa jetti, 440 adam jaraqat aldy. Qıraǵan ǵımarattar sany - 140.

Buǵan deıin Túrkııadaǵy jer silkinisi saldarynan Sırııada qaza tapqan 100 adam týraly jazǵan edik.