Sırııada zilzala qurbandarynyń sany 1,6 myńnan asty

ASTANA. QazAqparat – Epıtsentri Túrkııanyń Kahramanmarash qalasynan týyndaǵan joıqyn zilzaladan Sırııada 1602 adam qaza tapty, 3649 adam jaralandy, dep habarlaıdy QazAqparat Anadoly agenttigine silteme jasap.

Іzdeý-qutqarý jumystary Idlıb, Aleppo, Hama, Latakıa jáne Tartýs aýdandarynda jalǵasýda.

Jergilikti SANA aqparat agenttiginiń (Bashar Asad rejıminiń baqylaýynda) habarlaýynsha, Aleppo, Latakıa, Hama jáne Tartýsta 812 adam qaza taýyp, 1449 adam jaralandy. Qıraǵan úıler óte kóp.

Sırııanyń soltústigindegi oppozıtsııa baqylaýyndaǵy aýdandarda da kóptegen ǵımarattar qırap, búlingen.

Sırııanyń adam quqyqtaryn qorǵaý uıymy (SNHR) jáne Sırııanyń azamattyq qorǵanys basqarmasy Idlıb pen «Evfrat qalqany» jáne «Záıtún butaǵy» operatsııalary aımaǵynda kem degende 790 adam qaza taýyp, 2,2 myńnan astam adam jaralanǵanyn aıtýda.

Eske sala ketsek, 6 aqpanda Túrkııanyń ońtústik-shyǵysynda magnıtýdasy jeti baldan asatyn eki jer silkinisi boldy (jergilikti ýaqyt boıynsha 04.17-de – 7,7 ball jáne 13.24-te-7,6 ball). Saldarynan qaza tapqandar sany 3,3 myńnan asty.

Prezıdent Rejep Taıyp Erdoǵan Túrkııada apat qurbandary úshin jeti kúndik Jalpyulttyq aza tutý týraly jarııalady. Túrkııanyń memlekettik týlary búkil el boıynsha tómendetildi.

Kórshiles elderde, sonyń ishinde Sırııada, Lıvanda, Soltústik Kıpr, grek Kıprinde jáne Irakta da joıqyn jer silkinisi bolǵan.

Foto: aa.com.tr