Sırııada jer silkinisi qurbandarynyń sany 1,7 myńnan asty

ASTANA. QazAqparat – Sırııada joıqyn jer silkinisterinen eń kemi 1782 adam qaza taýyp, taǵy 3749 adam jaraqat aldy, dep habarlaıdy QazAqparat Anadoly agenttigine silteme jasap.

Idlıb, Aleppo, Hama, Lazkıe jáne Tartýs aýdandarynda izdeý-qutqarý jumystary jalǵasýda.

SANA aqparat agenttiginiń habarlaýynsha (Bashar Asad rejıminiń baqylaýynda) Aleppo, Latakııa, Hama jáne Tartýsta 812 adam mert bolyp, 1449 adam jaralandy. Qıraǵan úıler kóp.

Sırııanyń soltústigindegi oppozıtsııa baqylaýyndaǵy aýdandarda kóptegen ǵımarattar qırap, búlingen.

Sırııanyń adam quqyqtaryn qorǵaý uıymy (SNHR) jáne Sırııanyń azamattyq qorǵanys basqarmasy Idlıb pen «Evfrat qalqany» jáne «Záıtún butaǵy» operatsııalary aımaǵynda kem degende 970 adam qaza taýyp, 2,3 myńnan astam adam jaralanǵanyn habarlaıdy.

Túrkııadaǵy jer silkinisi kórshiles elderde, sonyń ishinde Sırııada, Lıvanda, Kıpr aralynda jáne Irakta da tirkeldi.

Aıta ketsek, Qazaqstan Tótenshe jaǵdaılar mınıstrliginiń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy.

Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qutqarýshy ıtter bar.

Tıisti tapsyrmany Qazaqstan Prezıdenti Qasym-Jomart Toqaev berdi.

Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.

Sońǵy málimet boıynsha Túrkııadaǵy eki joıqyn jer silkinisinen qaza tapqandar sany 5834-ke jetti, 34 810 adam jaraqat aldy.

Foto: www.aa.com.tr