Sırııada úıindi astynan qutqarylǵan jańa týǵan shaqalaqty týystary asyrap aldy

DAMASK. QazAqparat – Sırııada qıraǵan ǵımarat úıindisiniń astynda ómirge kelgen qyzdy óziniń týysqan ápkesi men jezdesi asyrap aldy, dep habarlaıdy QazAqparat BBC News agenttigine silteme jasap.

Qutqarylǵan sátte kindigi kesilmegen qyzdy asyrap alýǵa myńdaǵan adam nıet bildirgen. Zilzaladan náreste otbasy músheleriniń ishinde jalǵyz ózi aman qalǵan.

DNQ ápkesiniń týys ekenin dáleldegennen keıin náreste aýrýhanadan shyǵaryldy. Dárigerlerdiń sózinshe, erekshe jaǵdaıda aman qalǵan qyzdyń jaǵdaıy óte jaqsy.

«Ol endi meniń balalarymnyń biri. Oǵan óz balamdaı qaraımyn»,- dedi jezdesi Halıl as-Savadı AP agenttigine.

Qyzǵa marqum anasynyń qurmetine Afraa degen at qoıyldy. Degenmen qutqarylǵannan keıin qyzdy Aıa dep ataǵany habarlanǵan bolatyn.

Ol arab tilinen aýdarǵanda «ǵajaıyp» degen maǵynany bildiredi.

Ony qutqarǵan sát beınelengen vıdeo Sırııadaǵy jer silkinisinen keıin áleýmettik jelilerde keńinen tarap ketti.

Vıdeoda er adam qolyna shań-shań qyzdy ustap, qırandy arasymen júgirip bara jatady.

Afraa qulaǵan ǵımarat astynda on saǵattan asa ýaqyt jatqan. Aýrýhanaǵa kelgen sátte dárigerler onyń jaǵdaıy aýyr ekenin, denesi kógerip, tilinip ketkenin málimdegen.

Onyń otbasy turǵan úı Túrkııamen shekaraǵa jaqyn mańdaǵy Idlıb provıntsııasyndaǵy Djındaırıste bolǵan 7,8 baldyq zilzaladan qıraǵan 50 ǵımarattyń biri edi.

Týystarynyń biriniń sózinshe, jer silkingennen keıin kóp uzamaı Afraanyń anasynyń tolǵaǵy bastalǵan, ol qaıtys bolǵanǵa deıin bosanyp úlgergen.

Onyń ákesi men anasy, tórt baýyry mert boldy.

«Bul qyz biz úshin óte baǵaly, sebebi onyń otbasynan basqa eshkim qalmady. Ol maǵan, ápkesi jáne barlyq týystaryna anasy men ákesin eske salyp turady», - dedi Halıl Reuters aqparat agenttigine.

Sonymen qatar ol Afraa eki apta aýrýhanada jatqan kezde ony bireýler urlap kete me dep qoryqqanyn aıtty, sebebi náresteni asyrap alý týraly usynys jan-jaqtan túsken.

Afraanyń jańa otbasy jaǵdaı qansha qıyn bolsa da, qyzdyń ózderimen birge turǵanyn jón kóredi. Halıl men jubaıy Halanyń úıi de zilzala kezinde qırady.

Qazir olar týystarynyń úıinde turyp jatyr.

Afraa jalǵyz óspeıdi, onyń kishkentaı sińilisi bar. Hala men Halıl de zilzaladan úsh kún ótkennen keıin qyzdy boldy.

Eske sala keteıik, biz buǵan deıin Sırııada kindigi kesilmegen náreste úıindi astynan qutqarylǵanyn habarlaǵan edik.

Foto: REUTERS