Sırııada qazaqstandyq Ál-Farabı ortalyǵynyń ashylýy birneshe jylǵa sozylyp ketti
Keshen úsh qabatty ǵımarattan, meshit, Ál-Farabıdiń beıiti men zııarat etip kelýshilerge arnalǵan orynnan, keńselik jáne oqý aýmaqtarynan, kitaphana men ekspozıtsııalyq zaldardan turady.
QR Mádenıet jáne sport mınıstrliginen ýáde etkendeı bıyl nysandy paıdalanýǵa berý máselesine núkte qoıylmaq. Keshen vedomstvonyń turaqty túrde baqylaýyna alynǵan. Ol úshin QR MSM-niń mádenıet jáne óner departamentiniń dırektory Almaz Nurazhan jaýapty.
«Men ótken jyly mınıstrlikke kelgen ýaqytta birneshe sheshilmegen suraqtar bar edi. Onyń biri - dál osy Damaskidegi keshenniń jumysy bolatyn. Qazaqstan men Sırııa arasynda kelisim bolǵandyqtan, bul óte mańyzdy suraq. Kelisimge 2008 jyldyń 21 qarashasynda qol qoıyldy. Bul - bizdiń Úkimet qarjylandyrýǵa mindettelgen óte aýqymdy joba» - deıdi A.Nurazhan.
Onyń aıtýynsha, qurylys jumystary 2012 jylǵa deıin sátti júrgizilgen. Sol kezdiń ózinde keshenniń qurylysy aıaqtalyp qoıypty. Kelisimge sáıkes, ortalyq pen kesene jumysy aıaqtalǵannan keıin Sırııa Úkimetine berilip, mýzeıdiń odan keıingi jumysy boıynsha qosymsha kelisimder jasalýy kerek edi. Jospar boıynsha, nysandy qoldanysqa engizý jaǵyn sırııalyq tarap, al Uly oıshyl týraly aqparattar men tarıhı málimetterdi jınaý jumysymen qazaqstandyq tarap aınalysýy kerek edi. Alaıda 2013 jyly Sırııada qaqtyǵystar bastalyp ketken.
«Eki jaqty kelisimge sáıkes, ótkizý-qabyldaý qujatyna qashyqtyqta qol qoıylǵan. Alaıda Sırııa Úkimeti nysandy qabyldaǵan joq. Sebebi, onda Úkimet ataýlynyń ózi joq edi. Sondyqtan, bizdiń mınıstrlik nysandy resmı tapsyrylýyna deıin saqtaý týraly sheshim qabyldady», - deıdi departament dırektory.
Birneshe jyl boıy ashylýǵa daıyn ortalyq pen kesene sol kúıinde tur. Nysandy sodan beri úsh kúzetshi men jaýapty doktor Sýleıman Zıada baqylap keledi. Olardyń jumysy úshin «Qazrestavratsııa» RMK óz qarajatynan úsh jyl boıy aqsha tólep keldi.
«Zańdy turǵyda buny durys deýge kelmeıdi. Nelikten bizdiń jumysshylar tapqan aqshasyn berýi kerek. Biraq, moraldyq turǵyda biz basqa qadamǵa bara almadyq. Adamgershilik turǵysynan oıladyq», - deıdi Almaz Nurazhan.
Osylaısha, Sırııadaǵy jumysshylardyń aılyǵy úshin 2014 jyly 2,8 mln, 2015 jyly 7,1 mln, 2016 jyly 1,9 mln teńge bólingen. Ótken jyly kúzetshiler men doktordyń aqsha alýy toqtap, Qazaqstan ortalyq pen keseneni tastap ketkendeı kóringen.
Anyqtalǵanyndaı, «Qazrestavratsııa» RMK aqsha aýdarylyp otyrǵan kompanııaǵa qarajat joldaı almaı qalypty. 2016 jyly ondaǵy kompanııa turǵylyqty jerin aýystyrǵan. Sondyqtan, «Qazrestavratsııa» aqshanyń jetkeni nemese jetpegenine kóz jetpeıtindikten, qarajat joldaýdy toqtatyp qoıǵan.
«Biz Qazaqstanda sırııalyq dıasporanyń ókili Samır Álı Derehpen, qor dırektory Sapar Ysqaqovpen baılanystyq. Olardyń bergen aqparatyna sáıkes, nysan áli kúnge deıin kúzetilip tur. Jalǵyz ǵana tilekteri - aqsha tólep berýdi surap otyr. Olarmen ótken jyldyń jeltoqsanynda sóıleskendikten, osy jyldyń aqpan-naýryz aılarynda másele sheshimin tabar dep otyrmyz (...) Soǵys júrip jatqan elde bundaı máselege mán berilmeıtini anyq. Sırııa bıliginiń bizge ózderiniń shyǵyp otyrǵanyn - bizdiń dıplomattardyń sátti jumysynyń nátıjesi degen oıdamyz. Biz qazirgi ýaqytta Syrtqy ister mınıstrligimen birigip, kúrdeli jaǵdaıdan laıyqty túrde shyqqymyz keledi. Ortalyqtyń aldaǵy ýaqytta damýyna úmit artamyz», - deıdi Almaz Nurazhan.
Ál-Farabı ortalyǵy men kesenesiniń ashylýy áli de birshama ýaqytqa sozylýy múmkin. Ortalyq shamamen birneshe aıdan soń ashylyp qalýy yqtımal.