Sırııada Qazaq ulttyq ýnıversıtetiniń fılıaly ashylady

ALMATY. QazAqparat - Qazaqstandyq jetekshi bilim ordasy ál-Farabı atyndaǵy Qazaq ulttyq ýnıversıteti Sırııa astanasy Damask qalasynan fılıalyn ashady. Bul bastama Almatyda Ábý Nasyr ál-Farabıdiń 1150 jyldyǵy merekesin atap ótý saltanatynyń bastaý alýy barysynda aıtyldy, dep habarlaıdy QazAqparat ýnıversıtettiń baspasóz qyzmetine silteme jasap.

Mereıtoılyq jyldyń resmı rásiminiń ashylýynda sóz alǵan QR Memlekettik hatshysy Qyrymbek Kósherbaev uly oıshyldyń 1150 jyldyq mereıtoıyn atap ótý aıasynda aýqymdy sharalar tek el kóleminde ǵana emes, shetelderde de josparlanǵanyn, sonyń ishinde Qazaqstannyń Damask qalasyndaǵy tarıhı-mádenı ortalyǵy bazasynda QazUÝ fılıalyn ashý qarastyrylǵanyn jetkizdi.

Bul bastama QazUÝ rektory akademık Ǵalym Mutanovtyń ál-Farabı jylynyń saltanatty ashylýyna kelgen Damask Ýnıversıtetiniń prezıdenti professor Mohammed Maher Kabakıbımen kezdesýinde talqylandy

«Biz bul ıdeıany tolyqtaı qoldaımyz jáne fılıaldyń qurylýyna, alǵa jyljýyna kómek beremiz. Bul halyqaralyq koloboratsııa úshin jaqsy úlgi bolady, Qazaqstan men Sırııa ǵylymı-bilim berý salalarynda ekijaqty qarym-qatynasyn nyǵaıtyp, ál-Farabı muralaryna tereńnen zertteý júrgizýdi arttyrady», - deıdi Damask ýnıversıtetiniń rektory.