Sırııada «Islam memleketiniń» joǵary shendi komandıriniń kózi joıyldy

AMMAN. QazAqparat – AQSh ortalyq qolbasshylyǵy (CENTCOM) Sırııada júrgizilgen operatsııa týraly málimdedi. Operatsııa nátıjesinde «Islam memleketi» Halyqaralyq lańkestik top qolbasshylarynyń biriniń kózi joıylǵan, dep habarlaıdy QazAqparat tilshisi.

AQSh qarýly kúshteri dúısenbi kúni Sırııada tikushaqpen júrgizgen operatsııa nátıjesinde «IM» tobynyń joǵary shendi qolbasshylarynyń biriniń kózin joıdy.

Aqparat boıynsha, mert bolǵan Abd ál-Hadı Mahmýd ál-Hadjı Álı Taıaý Shyǵys pen Eýropaǵa lańkestik shabýyl josparlaǵan.

Málimdemede ol «kóshbasshy, Taıaý Shyǵys pen Eýropadaǵy lańkestik shabýyldardy josparlaýǵa jaýapty jedel josparlaýshy» dep sıpattalǵan.

CENTCOM habarlaýynsha, tikushaq operatsııasy «IM» sheteldegi resmı tulǵalardy urlaýdy josparlaǵanyn dáleldeıtin barlaý derekterinen keıin júrgizilgen.

Sondaı-aq málimdemede IM tobynyń taǵy basqa eki múshesi óltirilgeni habarlandy. Operatsııa týraly basqa derek berilmegen.

«Reıd maqsatty tulǵanyń ólimine ákeldi, qarýlanǵan basqa eki adam óltirildi», - delingen málimdemede.

«Adam quqyqtary jónindegi Sırııa observatorııasy» uıymy soqqy Sırııanyń Túrkııamen shekaradaǵy Djarablýs qalasynan batysqa qaraı shamamen 25 shaqyrym jerdegi aýylda - as-Sýveıde ǵımaratyna jasalǵanyn habarlady.

Buǵan deıin osy aıda Amerıka áskeri Sırııaǵa shabýyl jasap, Túrkııa men Eýropaǵa terakt josparlaýǵa jaýapty IM joǵary shendi kóshbasshysynyń kózin joıǵanyn málimdegen bolatyn.