Sırııa men Irakta júrgen qazaqstandyqtardyń ata-analaryna balalaryn qaıtarý tártibi túsindirildi

ASTANA. QazAqparat - QR Qoǵamdyq damý mınıstri Darhan Káletaev sońǵy jyldary balalary terrorıstik belsendilik joǵary aımaqtarǵa (Sırııa-Irak aımaǵy) shyqqan ata-analardyń bastamashyl tobymen kezdesti, dep habarlaıdy QazAqparat.

Jekelegen máselelerdi jedel sheshýdi qamtamasyz etý úshin Astanada ótken kezdesýge birqatar múddeli memlekettik organdardyń ókilderi de shaqyryldy.

Mınıstrliktiń baspasóz qyzmetinen málim etkendeı, kezdesý barysynda soǵys is-qımyldary aımaqtarynda júrgen Qazaqstan azamattary bolyp tabylatyn áıelder men kámelettik jasqa tolmaǵan balalardy izdep-tabýmen jáne olardy otanyna qaıtarýmen baılanysty máseleler talqylandy.

Mınıstr D.Káletaev jáne ózge memlekettik organdar ókilderi ata-analar tobyna QR azamattaryn elge qaıtarý máseleleri boıynsha, sondaı-aq qajetti qujattardy rásimdeý jóninde túsinikteme berdi.

Kezdesýdiń nátıjesi boıynsha mınıstrlik janynda turaqty Jumys tobyn qurý jáne osyndaı kezdesýlerdi turaqty negizde ótkizý týraly ýaǵdalastyqqa qol jetkizildi.