Sırııa boıynsha Astana protsesiniń kezekti otyrysy ótedi
Astana formatynda buryn ótken sırııaaralyq kelissózderge uqsas, aldaǵy kezdesýde Iran, Reseı men Túrkııa, Sırııanyń úkimeti men qarýly oppozıtsııasy ókilderi, sondaı-aq BUU men Iordanııanyń baqylaýshylar deńgeıindegi delegatsııalar qatysady.
Kelissózderdiń kezekti raýndy Sırııa baǵytynda eń ózekti máselelerdi, sonyń ishinde Idlıb provıntsııasy men Sırııanyń soltústik-shyǵysyndaǵy qazirgi ahýaldy, qaqtyǵysýshy taraptar arasyndaǵy senimdi odan ári nyǵaıtýǵa baǵyttalǵan sharalardy, sondaı-aq bosqyndar men el ishindegi qonys aýdarǵan adamdardy qaıtarýǵa qolǵabys kórsetý, gýmanıtarlyq jaǵdaıdy jaqsartý jáne eldi qaqtyǵystan keıingi qaıta qalpyna keltirý máselelerin talqylaýdy josparlap otyr. Sonymen qatar, aldyn ala kún tártibine sáıkes, Sırııa boıynsha konstıtýtsııalyq komıssııany qurý jáne iske qosý boıynsha jumysty aıaqtaýǵa basa nazar aýdara otyryp, saıası protsesti odan ári ilgerletý joldaryn talqylaý, sondaı-aq Astana protsesine jańa baqylaýshy memleketterdiń qosylý máselesi qarastyrylady.
25 sáýirde Astana protsesiniń kepilger elderiniń ekijaqty jáne úshjaqty konsýltatsııalary, sondaı-aq baıqaýshy taraptarynyń ókilderimen kezdesýleri, al jalpy otyrys 26 sáýirde ótedi.
Sonymen birge, Sırııa boıynsha joǵary deńgeıdegi 12-shi halyqaralyq kezdesý sheńberinde Tutqyndardy bosatý, qaza tapqandardyń denelerin tabystaý jáne iz-túzsiz joǵalǵandardy izdestirý boıynsha jumys tobynyń 8-shi otyrysyn ótkizý josparlanyp otyrǵanyn eskere otyryp, atalǵan otyrysqa qatysý úshin BUU bosqyndar isteri jónindegi Joǵarǵy komıssar basqarmasynyń jáne Halyqaralyq Qyzyl Krest Komıtetiniń ókilderine tıisti shaqyrýlar joldanady.