Sırııa boıynsha Astana kelissóziniń ýaqyty ózgeredi degen aqparat joq - QR SІM

ASTANA. QazAqparat - QR Syrtqy ister mınıstrliginde Sırııa kelissózderi boıynsha Astana protsesi 6-shy kezdesýiniń ýaqyty ózgeredi degen málimet joq. 

Bul jaıynda atalǵan vedomstvonyń baspasóz qyzmetiniń jetekshisi Ánýar Jaınaqov málim etti, dep habarlaıdy QazAqparat.

«Bizde Sırııa boıynsha kelissóz ótkizý merziminiń ózgergendigi týraly esh málimet joq»,-  dedi Ánýar Jaınaqov.

Sonymen qatar SІM ókili kelissózder merzimi ózgeretin bolsa, onda mindetti túrde bul jaıynda habar beretindigin basa aıtty.

«Eger bizge kelissózder protsesine barlyq qatysýshynyń aldaǵy kelissóz ótkizý datasyna qatysty kelisilgen ózgerisi kelip túsetin bolsa, onda biz bul jaıynda der ýaqytta aqparat beretin bolamyz», - dedi ol.

Aıta keteıik, Astana  protsesiniń kelesi kezeńi tamyz aıynyń sońyna belgilengen. Degenmen, birqatar BAQ sırııaaralyq kelissózderdiń odan erterek ótýi múmkin degen aqparat taratqan bolatyn.