Sırek kezdesetin jaıt: Atyraý mańyna qoqıqazdar ushyp keldi
«Aqjaıyq» memlekettik tabıǵı rezervaty ǵylym jáne monıtorıng bóliminiń ǵylymı qyzmetkeri Ilıa Bofonovtyń aıtýynsha, buryn qoqıqazdar Atyraý qalasynyń mańyna jaqyn kelgen emes.
«Bul – sırek kezdesetin jaıt. Jergilikti turǵyndar arasynda «Sasyq saı» atalyp ketken býlaný alańy qoqıqazdardyń aıaldaıtyn ornyna aınalǵan. Demek, bul alańda qoqıqazdarǵa tabıǵı azyq bolatyn usaq shaıantárizdiler bar dep boljaýǵa bolady. Munda ósimdikter men mıkroaǵzalardy ósiretin mıkrobıologııalyq protsester júrgizilip jatyr», - deıdi Ilıa Bofonov.
Onyń pikirinshe, Qyzyl kitapqa engizilgen qoqıqazdardyń qonǵanyna qaraǵanda, býlaný alańynda ekologııalyq jaǵdaı jaqsara bastaǵan bolýy múmkin.
Atyraý oblystyq energetıka jáne turǵyn úı-kommýnaldyq sharýashylyq basqarmasynyń málimetine súıensek, bul býlaný alańy 1945 jyly iske qosylǵan.
«Atyraý qalalyq ákimdigi 476 gektar aýmaqta ornalasqan býlaný alańyn qalpyna keltirý úshin jobalyq-smetalyq qujattamasyn ázirlep, saraptamanyń oń qorytyndysyn aldy. Qalpyna keltirý jumysy 2021 jylǵy tamyzda bastaldy. Jobany iske asyrýdyń birinshi jylynda topyraq tasylyp, bógetter salyndy. Arnaıy alań daıyndaldy. Tunba shógindileri jınalyp, ýchaskeler qamystan tazartyldy. Al byltyr býlaný alańynan 355 myń tekshe metrden astam tunba shógindileri alynyp, tazartyldy. Qazir bógetterdi toltyrý, tegisteý jáne tyǵyzdaý úshin ınertti materıaldar satyp alyndy. Joba boıynsha býlaný alańyn qalpyna keltirýdi osy jyldyń sońyna deıin aıaqtaý josparlanyp otyr», - dep habarlady oblystyq ákimdikten.
Eske sala ketelik, buǵan deıin Atyraý turǵyny Jaıyq ózenindegi sýdyń jasyl túsine alańdaýshylyq bildirgenin jazǵan edik.