Syrdarııa boıynsha aınalma kanal júrgizý jobasy kelesi jyly qarjylandyrylady

<p>Syrdarııa ózeniniń joǵarǵy aǵysynan uzyndyǵy 6,1 shaqyrym aınalma kanal júrgiziledi. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy <a href="https://kaz.inform.kz/search_results/?q=%D0%A1%D1%8B%D1%80%D0%B4%D0%B0%D1%80%D0%B8%D1%8F" target="_blank" rel="noopener">Kazinform.</a></p>

«Jańaqorǵan aýdanyndaǵy Kelintóbe magıstraldyq kanalynyń boıynda ornalasqan 30 myń gektar sýarmaly jerdi sýmen qamtamasyz etý maqsatynda 2013 jyly «Qazsýshar» RMK qarajaty esebinen sýtartqysh salynyp, paıdalanýǵa berildi. Alaıda 2017 jyly Syrdarııa ózeniniń arnasy boıymen jiberiletin sýdyń kóp bolýynan týyndaǵan sý tasqynyna baılanysty beton taqtalary shaıylyp, sýtartqysh isten shyqty», - dedi Úkimet basshysy jaýabynda.

Premer-Mınıstrdiń atap ótýinshe, osyǵan baılanysty Qyzylorda oblysynyń ákimdigi «Qyzylorda oblysynyń Jańaqorǵan aýdanyndaǵy Kelintóbe magıstraldyq kanalyna sý beretin kanaldyń qurylysy» jobasyn iske asyrýǵa arnalǵan jobalaý-smetalyq qujattamany ázirledi. Oǵan memlekettik saraptamanyń oń qorytyndysy bar.

«Jobada ózenniń joǵarǵy aǵysynan uzyndyǵy 6,1 shaqyrym aınalma kanal júrgizý jáne Kelintóbe magıstraldyq kanalyna qosymsha sekýndyna 11-20 tekshe metr sý berý (jobanyń kuny 542,8 mln teńge) kózdelgen. Atalǵan obektini salý úshin 2024-2026 jyldarǵa arnalǵan respýblıkalyq bıýdjet jobasynda 2024 jyly ony qarjylandyrýǵa 488 mln teńge kóleminde qarajat kózdelgen», - dedi Álıhan Smaıylov.