«Syr jastary»: Qyzylordada 60 páterlik turǵyn úı paıdalanýǵa berildi
Búgin oblys ákimi Nurlybek Nálibaevtyń qatysýymen Qyzylorda qalasynyń sol jaǵalaýynan salynǵan jańa turǵyn úıdi paıdalanýǵa berýge baılanysty saltanatty is-shara ótti. Oǵan qala ákimi Serik Qojanııazov, oblystyq ardagerler keńesiniń tóraǵasy Serik Dúısenbaev, ardagerler, «Dáneker» JShS basshysy Ábdimájıt Jansaqalov, jaýapty sala basshylary jáne turǵyndar qatysty.
Oblys ákimi jańa páter ıelerin qonystoımen quttyqtap, aımaqtyń qurylys salasyndaǵy jańalyqtaryna toqtaldy.
«Jastarymyzdy sapaly bilimmen, jumyspen jáne baspanamen qamtý memlekettik saıasattyń basym baǵyty sanalady. Jas otbasylar úshin eń ózekti máseleniń biri – baspana. Osyny ekserip, 2022 jyldyń jeltoqsan aıynda ótken oblystyq jastar forýmynda alǵash ret nesıelendirý jolymen «Syr jastary» baǵdarlamasyn júzege asyrý týraly sheshim qabyldanǵan bolatyn. «Otbasy bank» aktsıonerlik qoǵamyna bıýdjettik kredıt berý úshin oblystyq bıýdjetten 1,2 mlrd teńge bólindi. «Syr jastary» – aımaq jastaryn baspanamen qamtý baǵytynda qolǵa alynǵan óńirlik tyń joba. «Jumyla kótergen júk jeńil» degen sóz bar halqymyzda. Baǵdarlamany birlesip júzege asyrý úshin «Otbasy bank» AQ 500 mln teńge qarjy bóldi. Búgingi qonystoı – osy birlesken jumystyń jemisi», - dedi oblys ákimi.
Memleketimizdiń turǵyndarǵa jasaǵan qamqorlyǵy men usynǵan múmkindikteriniń arqasynda ár azamat óz shańyraǵynyń ıesi atanýda. Ótken jyly aımaqta 4 108 páterlik 300 turǵyn úı salyndy, 2 400-ge jýyq páter tabystalyp, 11 myńnan astam turǵyn qonystoı toılady.
«Halyqtyń jaıly turmysyna oń áser etetin bul jumystar bıyl da jalǵasýda. Bıýdjet qarajaty esebinen 13,3 mlrd teńgege 1 269 páterlik 67 turǵyn úıdiń qurylysy júrgiziledi. Onyń ishinde 350-deı páter aýdandarǵa tıesili. Jyl basynan beri 402 otbasy baspana baqytyna keneldi. Búgin 60 jas otbasynyń qýanyshyn eseleımiz. Jaqyn kúnderi Tasbóget kentinen 150 páter halyq ıgiligine beriledi. Bul – áleýmettiń ál-aýqatyn arttyrýdaǵy memlekettik qoldaýdyń naqty kórinisi», - dep tolyqtyrdy sózin oblys ákimi.
Jıynda turǵyn úıdi salǵan «Dáneker» qurylys kompanııasynyń qyzmetkerleri oblys ákiminiń Alǵys hatymen marapattaldy. Páter kiltin alǵandar qatarynda ustazdar, medıtsına, mádenıet jáne sport salalarynyń qyzmetkerleri, jýrnalıster jáne ózge de sala mamandary bar.
Qyzylordadaǵy qurylys qarqyny, ásirese áleýmettik nysandardyń kóptep salynýy osy salanyń jumysyna sony serpin bermek. Máselen, 300 oryndyq jataqhanasy bar 400 oryndyq fızıka-matematıka mektep-ınternaty jańa oqý jylynda tabystalady. Memleket basshysynyń bastamasymen qolǵa alynǵan «Jaıly mektep» ulttyq jobasy aıasynda bıyl 10 mektep paıdalanýǵa beriledi. Taǵy 11 mekteptiń qurylysy bastalady. Oblys ortalyǵynda balalar men jasóspirimderdi shyǵarmashylyqqa baýlıtyn «Shyǵarmashylyq akademııasynyń», eki aýdanda Oqýshylar úıi men Óner mektepteriniń, Qyzylorda qalasynda ústel tennısi ortalyǵynyń qurylysy júrýde. Halyqaralyq standarttarǵa saı keletin jabyq basseıni bar kópsalaly dene shynyqtyrý-saýyqtyrý kesheniniń qurylysy bastaldy.
Atap óterligi, oblys ortalyǵynda halyqaralyq talaptarǵa saı keletin, 10 myń oryndyq jańa stadıonnyń irgetasy qalandy. Endigi kezekte jańa stadıon UEFA talaptaryna sáıkes keledi.
«QazGerMunaı» kompanııasynyń demeýshiligimen qolǵa alynǵan 350 oryndyq zamanaýı úlgidegi Oqýshylar saraıy da, «Saýts Oıl» kompanııasynyń demeýshiligimen boı kótergen 650 oryndyq mýzykalyq kolledj ǵımaraty da jýyq arada halyq ıgiligine aınalmaq. Barlyq aýdanda neke qııý zaly, kitaphana, mýzeı, arhıv, jastar saraıy, ardagerler men analar úıin biriktiretin «Rýhanııat» ortalyqtary salynyp jatyr.