Sıntetıkalyq esirtki daıyndaýǵa arnalǵan 72 tonna prekýrsor tárkilendi

ASTANA. QazAqparat – Іshki ister mınıstrligi «Sıntetıka» óndirisine arnalǵan 72 tonna prekýrsorlardy tárkiledi. Bul týraly ІІM baspasóz qyzmetiniń ókili Shuǵyla Turlybek málim etti, dep habarlaıdy QazAqparat tilshisi.

«ІІM Esirtki qylmysyna qarsy is-qımyl departamenti ónerkásiptik aýqymda sıntetıkalyq esirtki óndirý úshin elge prekýrsorlar jetkizýdi jolǵa qoıǵan Qazaqstan men taıaý sheteldikterden quralǵan transulttyq qylmystyq toptyń jolyn kesti», - dedi Shuǵyla Turlybek Іshki ister mınıstrliginiń baspasóz qyzmeti alańynda ótken brıfıng barysynda.

Onyń atap ótýinshe, operatsııa barysynda sıntetıkalyq esirtki daıyndaýǵa qajetti prekýrsorlar kontrabandasyna qatysy bar úsh sheteldik ustalǵan. Al operatsııanyń sońǵy kezeńinde, ótken aptada Almatyda osy iske qatysty qalǵan qatysýshylar qolǵa tústi.

«Olar eki sheteldik jáne bir qazaqstandyq bolyp shyqty. Qylmyskerlerden mefedron, shet memlekettiń polıtsııa qyzmetkeriniń jalǵan kýáligi, zıp-paketter, elektrondyq tarazylar, Kalashnıkov avtomatynyń patrondary tárkilendi. Qoıma úı-jaılaryn tintý barysynda ІІM jáne Almaty qalasy polıtsııa departamentiniń qyzmetkerleri sıntetıkalyq esirtkilerdi daıyndaý kezinde qoldanylatyn prekýrsorlardy, sondaı-aq reaktorlardyń eki birligin - sıntetıkalyq esirtkilerdi daıyndaýǵa arnalǵan arnaıy zerthanalyq jabdyqty tapty. Tárkilengen prekýrsorlardyń jalpy kólemi 72,7 tonnany qurady. Osylaısha 8 tonna sıntetıkalyq esirtki óndirýge jol berilmedi. Bul 8 mıllıon bir rettik dozany quraıdy. Qazirgi ýaqytta tergeý áreketteri júrgizilýde», - dedi ol.