Sıntetıkalyq esirtki saqtaǵan kókshetaýlyq azamat 4 jylǵa sottaldy

<p>KÓKShETAÝ. KAZINFORM - Kókshetaý qalasynyń turǵyny sıntetıkalyq esirtkini saqtaǵany úshin 4 jylǵa bas bostandyǵynan aıryldy.</p>

Aqmola oblysy prokýratýrasy baspasóz qyzmetiniń málimetinshe, Kókshetaý qalalyq sotynda asa iri mólsherde psıhotroptyq zattardy saqtaǵany úshin qala turǵynyna qatysty ashyq sot otyrysy ótti. 

K esimdi azamattyń Telegram messendjeri arqyly psıhotroptyq zattardy satyp alǵany anyqtaldy. Polıtsııa qyzmetkerleri ony kóp uzamaı qolǵa túsirgen. Ustalǵan kezde kúdikti masań kúıde bolǵan. 

«Sot azamat «K»-ny kináli dep tanyp, 4 jylǵa bas bostandyǵynan aıyrý jazasyn ortasha rejımdegi túzeý mekemesinde óteý týraly úkim shyǵardy. Sonymen birge atalǵan azamat nashaqorlyqtan emdeletin boldy. Jastar arasynda esirtki qoldanýdyń aldyn alý maqsatynda sot otyrysyna stýdentter tyńdaýshy retinde qatysty», - dedi vedomstvodan.

Foto: Aqmola oblysy prokýratýrasynyń baspasóz qyzmetinen

Sot úkimi zańdy kúshine engen joq. 

Aıta ketsek, buǵan deıin kóknár tuqymyn satqan kókshetaýlyq áıeldiń 10 jylǵa sottalǵanyn jazǵan edik.