«Synyptasyn quldyqta ustady»: qyzylordalyq oqýshylar ızolıatordan úıqamaqqa aýystyryldy

<p>QYZYLORDA. KAZINFORM — Qyzylorda qalasynda «synyptasyn seks-quldyqta ustady» degen kúdikke ilingen mektep oqýshylary úıqamaqqa aýystyryldy.</p>

Kúdiktilerdiń úıqamaqqa aýystyrylǵany jóninde Qyzylorda oblystyq soty túsinikteme berdi.

«Atalǵan ótinishhattardy Qyzylorda qalasynyń tergeý soty qaraǵan. Kúdiktilerge, kámeletke jasyna tolmaǵandarǵa úıqamaq túrindegi sanktsııalar qoldanyldy. Qazirgi ýaqytta tergeý sotynyń qaýlylaryna jábirlenýshi taraptan Qyzylorda oblystyq sotynyń qylmystyq ister jónindegi sot alqasyna shaǵym kelip tústi. Ol qaralý satysynda tur. Qaýlyǵa qalǵan qatysýshylar shaǵym jasamaǵan», — dep málim etti oblystyq sottan.

Budan buryn habarlaǵanymyzdaı, Qyzylorda qalasynda mektep oqýshylary «synyptasyn seks-quldyqta ustady» dep kúdikke ilindi. Bir top jasóspirim 16 jastaǵy qyzdy qınap ustaǵany, esirtki berip, jezókshelikpen aınalysýǵa májbúrlegeni týraly aqparat tarady. Oqýshy qyzdyń ata-anasy jaǵdaıdy qoǵamdyq qorǵa habarlaǵan. Al oqýshynyń «seks-quldyqta júrgenin» onyń dosy anyqtaǵan.