Sıngapýrda qazaqstandyq oqýshylar robototehnıkadan halyqaralyq chempıonatta rekord ornatty

<p>ASTANA. KAZINFORM &mdash; Sıngapýrda ótken First Lego League Challenge robototehnıkadan halyqaralyq chempıonat aıaqtaldy. Oǵan Ońtústik Koreıa, Malaızııa, Polsha, Indonezııa jáne Qytaıdan 100-den astam oqýshy qatysty. Atalǵan dodada qazaqstandyq oqýshylar álemniń jas ınjenerlerimen básekege tústi. Úsh kúnge sozylǵan jarys qorytyndysy boıynsha qazaqstandyqtar eń joǵary marapattarǵa ıe bolyp, rekord ornatty. Bul týraly QR Oqý-aǵartý mınıstrligi habarlady.&nbsp;</p>

Elimizdiń namysyn «Ro alemi» komandasynyń quramynda Semeı qalasynyń Bilim-ınnovatsııa jáne №22 orta mektebiniń oqýshylary Arystan Ibragım, Janarys Ardahov, Darhan Mamadılov, Aıdmuhamed Tabarakov, Ádiljan Qabykenov, Azat Saparaly jáne Jánibek Ábdikárimov qorǵady. Olar chempıonatta yqtımal 550 upaıdan 540 upaı jınap, rekord ornatty jáne «Robot Design» nomınatsııasyn jeńip aldy. Sonymen qatar, barlyq tórt baǵyt boıynsha joǵary nátıje kórsetkeni úshin «Champions Award» bas nomınatsııasynda bas júldeni qanjyǵalady.

Sondaı-aq qazaqstandyq Tamos Éducation mektebiniń «QSTEM-TAMOS Stars» komandasynyń quramynda óner kórsetken Madııar Namazaly, Nuráli Satybaldy, Rashıd Ahmedjanov jáne Ańsar Baıazerov chempıonattyń barlyq tórt baǵyty boıynsha joǵary kórsetkishterge qol jetkizip «Champions Award» nomınatsııasynda I oryn aldy.

Atyraý qalasynyń Bilim-ınnovatsııa lıtseıiniń oqýshylary «Pioneers» komandasynyń quramynda Málik Islam, Nurıslam Berikuly, Bekasyl Nurymjan, Erasyl Nurymjan, Almaz Abzal, Almas Erlanuly, Aldııar Shamar jáne Álisher Danılov óner kórsetti. Olar ınnovatsııalyq jobany tabysty júzege asyrǵany úshin «Innovation Project» nomınatsııasynyń fınalısteri atandy.

«Robottar oıynynda tapqyrlyq tanytyp qana qoımaı, komandanyń uıymshyldyǵyn, negizgi qundylyqtaryn tanytý kerek boldy. Biz ınnovatsııalyq jobamyzdy kórsettik. Bul keremet tájirıbe boldy, elimizdiń bizge úmit artyp otyrǵanyn bilgendikten, jeńis úshin bar kúsh-jigerimizdi saldyq. Nátıjesinde álemniń ozyq elderiniń arasynan sýyrylyp shyǵyp, rekord ornattyq», - deıdi qýanyshymen bólisken oqýshylar.

Oqýshylar halyqaralyq chempıonatqa joldamany QR Oqý-aǵartý mınıstrliginiń qoldaýymen Daryn RǴPO jáne USTEM Foundation qoǵamdyq qory uıymdastyrǵan FIRST Central Asia Ortalyq Azııa oıyndarynda jeńip alǵan bolatyn.