Sıngapýr prezıdenti Nazarbaev ýnıversıtetinde dáris oqydy
Halıma ıAkob óz sózinde Sıngapýr men Qazaqstan arasyndaǵy qarym-qatynas kóshbasshylardyń ózara is-qımylyna negizdeletinin basa aıtty.
«Biz bárimiz órkendeýge umtylamyz, onsyz ekonomıkalyq ósý bolmaıdy. Oǵan qosa, elderdiń úlken nemese kishi bolýyna qaramastan, anaǵurlym ınklıýzıvti aımaqtyq arhıtektýraǵa umtylamyz. Bizde túrli ulttyq kontekstter men ártúrli damý qajettilikteri bolǵanyna qaramastan, bárimiz birdeı quqyqtarǵa ıe bolamyz. Degenmen, bizdiń elderimizde uqsas tájirıbeler men uqsas qıyndyqtar bar. Men júregime óte jaqyn úsh baǵyt boıynsha oı bóliskim keledi. Birinshisi – bilim. Sıngapýr o basta-aq adam áleýetin arttyrýǵa baǵyttalǵan resýrstardy ınvestıtsııalady. Biz sońǵy jyldary jastar bilim ala alatyn jaǵdaılardy barynsha jaqsartyp kelemiz, ony óz qajettilikterine qaraı barynsha irikteımiz. Sondaı-aq bilim berý isine ártaraptandyrýdy engizemiz, osylaısha stýdentterimizge bilim berýdiń eń qyzyqty bóligin tańdaýǵa múmkindik beremiz», - dedi Sıngapýr prezıdenti.
Sonymen birge, H. ıAkob halyqtyń osal toptarynan shyqqan stýdentterge kómektesý, osylaısha olarǵa óz áleýetin arttyrýǵa jáne ony ashýǵa múmkindik berý bastamalary bar ekenin jetkizdi.
«Biz mektepterde ınklıýzıvti kontekstke umtylamyz, ómir boıy bilim alýdyń mańyzdylyǵyn túsinemiz jáne úzdiksiz oqytý, biliktilik bastamalaryn qoldaımyz. Bilim berý máselesi Qazaqstannyń 2050 jylǵa deıingi strategııasynyń basty bóligi ekenin estigenime qýanyshtymyn. Sondaı-aq, Qazaqstan-2025 strategııasy aıasynda ınklıýzıvti bilim berýdiń kún tártibin ilgeriletip, bilim berý máselesine úlken kóńil bóletinin bilemin. Nazarbaev ýnıversıteti de stýdentterge praktıkadan ótýge jáne óz daǵdylary men quzyretterin qoldanýǵa múmkindik beretinin bilemin. Munyń bári eńbek naryǵynyń qajettilikterine saı keletin adamı kapıtaldy damytýda óte mańyzdy. Jeke ózim eki el arasyndaǵy stýdentterdiń, oqytýshylar quramynyń kez kelgen tájirıbe almasýyn quptaımyn», - dedi Sıngapýr Prezıdenti.
Aıta keteıik, Sıngapýr Prezıdenti Halıma ıAkob Qazaqstanǵa memlekettik saparmen keldi.
Sondaı-aq, Qazaqstan-Sıngapýr bıznes forýmy aıasynda 275 mıllıon AQSh dollaryn quraıtyn 12 qujatqa qol qoıyldy.