Sıngapýr kompanııasy Almaty oblysynda «G4 City» spýtnık qalalaryn salady

NUR-SULTAN. QazAqparat - Almaty oblysyna jumys sapary sheńberinde QR Ulttyq ekonomıka mınıstri Áset Erǵalıev Almaty oblysynyń aýmaǵyndaǵy tórt spýtnıktik qala - «G4 City» qurý jobasymen tanysty, dep habarlaıdy QazAqparat mınıstrliktiń baspasóz qyzmetine silteme jasap.

Mınıstr «G4 City» jobasynyń kórsetilim galereıasynda boldy. Onda jobanyń tolyq aýqymdy modeli ornalasady, onyń ishinde Gate City spýtnıktik qalasynyń ońtústik josparlaý aımaǵynyń dálizin damytý da qarastyrylady.

Bolashaqta «G4 City» aqyldy qalaǵa aınalýy kerek, ol tórt aýdannan turatyn bolady: Gate District - bıznes -qarjy ortalyǵy, Golden District - bilim berý jáne medıtsınalyq hab, Growing District - óndiristik jáne logıstıkalyq hab, Green District - týrızm jáne oıyn-saýyq «Almaty-Qapshaǵaı» tas jolynyń boıynda ornalasqan.

Búgingi kúni «Qoıanqus» turǵyn alabyn damytýdyń birinshi kezeńiniń jobasy, jobalyq smetalyq qujattary ázirlendi jáne qurylysty bastaý úshin barlyq qajetti ınfraqurylym júrgizildi.

«G4 City» devolepmentti damytýdy Sıngapýr Surbana Jurong Group memlekettik kompanııasy júzege asyrady. Bul Azııadaǵy iri qalalyq jáne ınfraqurylymdyq korporatsııalardyń biri. Sıngapýr Temasek Holdings ulttyq baılyq qoryna jatady, 16 myń adam jumys isteıdi, álemniń 40 elinde bar. Kompanııa Sıngapýrda 1 mıllıonnan astam páterdiń qurylysyn aıaqtady, 30 elde bas josparlardy ázirledi jáne 100 -den astam ındýstrıaldy parkterdiń jobasyn jasady.

Sonymen qatar, aǵymdaǵy jylǵy 30 qyrkúıekte Sıngapýr delegatsııasynyń Qazaqstan Respýblıkasyna sapary sheńberinde QR Ulttyq ekonomıka mınıstrliginiń basshysy Sıngapýrdyń «Surbana Jurong Group» ınvestıtsııalyq kompanııasynyń basshylyǵymen kezdesti.

Taraptar Almaty aglomeratsııasyn damytýdyń ınvestıtsııalyq jobasyn júzege asyrýdyń keleshegin talqylady jáne «G4 City» jobasy boıynsha ózara tıimdi yntymaqtastyqty atap ótti.