Sındzo Abeniń ólimi dinı uıymnyń alǵan kegi bolýy múmkin

NUR-SULTAN. QazAqparat – Japonııanyń burynǵy premer-mınıstri Sındzo Abeni atyp óltirgen Tetsýıa ıAmagamı degen burynǵy áskerı qyzmetker polıtsııa bólimshesinde eki kún tergelgen soń prokýrorlarǵa tapsyryldy, dep habarlaıdy QazAqparat Euronews-ke silteme jasap.

Tergeý amaldary jalǵasýda. Japondyq BAQ-tyń habarlaýynsha, kúdikti tergeýshilerge burynǵy úkimet basshysyn anasy múshe bolǵan dinı uıymmen baılanysy bar dep eseptegendikten, atyp tastaǵanyn aıtqan. Al bul otbasynda qarjylyq qıyndyqtar týǵyzǵan.

Polıtseıler qylmys ornynan taspamen jabystyrylyp baılanǵan bolat tútikterden qoldan jasalǵan tapanshany tapqan bolatyn. Kúdiktiniń páterinen de osyǵan uqsas qarý úlgileri alynǵan.

«Meniń oıymsha, kúzet pen qaýipsizdik sharalarynda problemalar bolǵanyn joqqa shyǵara almaımyz. Qalaı bolǵanyn anyqtaý úshin múmkindiginshe tezirek egjeı-tegjeıli tergeý júrgizilýi kerek», - dedi Nara polıtsııasynyń basshysy Tomoakı Onıtsýka.

Atap aıtqanda, tártip saqshylary qylmyskerdiń Naradaǵy úgit-nasıhat mıtınginde sóz alǵan Sındzo Abege qalaı jaqyndaı alǵanyn jáne burynǵy premer-mınıstrdiń kúzetshileri buǵan nege tosqaýyl qoımaǵanyn túsinýge tyrysýda.

Aıta keteıik, osy ýaqytta Japonııada parlamenttiń joǵarǵy palatasyna saılaý ótip jatyr. Sındzo Abe múshe bolǵan Lıberaldy-demokratııalyq partııanyń qazirgi jetekshisi, premer-mınıstr Fýmıo Kısıda qazir «erkin jáne ádil saılaý» ótkizý óte mańyzdy, óıtkeni olar «demokratııanyń negizi» ekenin málimdedi.