SІM shetelde turaqty turyp jatqandarǵa sol elde qala turýǵa keńes beredi

NUR-SULTAN. QazAqparat – Qazaqstannyń shet elderdegi Elshilikterinde jumys isteıtin qyzmetker arasynda koronavırýs juqtyrǵandar joq. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«Qazaqstannyń árbir Elshiliginde jedel shtab qurylǵan. Olar qońyraýlar men elektrondy poshta arqyly ótimderdi qabyl alyp, kúni-túni jumys istep jatyr. Ótinish túsken sátten-aq olardy tekserip, konsýldyq esepke alamyz, jergilikti bılikpen baılanysamyz. Negizinen sol elderdiń Syrtqy ister mınıstrlikteri arqyly jumys istep jatyrmyz. Dıplomattardyń eshqaısy vırýs juqtyrǵan joq. Dıplomatııalyq korpýs ókildikterimizden de koronovırýs juqtyrdy degen kúdigine ilikkender bolǵan emes. Degenmen, olar ózderiniń densaýlyqtaryna qater tóndire otyryp, aldyǵy shetpe jumys isteýde. Dıplomattarymyz adamdar kóp jınalatyn áýejaı sııaqty jerlerge óz kólikterimen jıi baryp, azamattarymyzdy shyǵaryp salady», - dedi Aıbek Smadııarov.

Onyń atap ótýinshe, koronavırýs órship turǵan elderdegi dıplomattardyń otbasylary úı rejımine aýystyrylǵan jáne eshqaıda shyqpaıdy. Balalardy qashyqtan bilim alýda nemese demalysqa jiberilgen.

«Densaýlyq saqtaý mınıstrliginiń shtabymen, ákimdiktermen tyǵyz jumys istep jatyrmyz. Búginnen bastap azamattarymyz elge orala bastaıdy. Túrli elderde turaqty turatyn, jumys isteıtin, oqıtyn azamattarymyz bar. Olardyń árqaısysy derbes sheshim qabyldaıdy. Degenmen, biz olarǵa turyp jatqan elderiniń erejelerin saqtaýǵa jáne sol jerde qalýǵa keńes beremiz. Biraq, azamattarymyz elge oralýǵa nıet bildirse, onda Úkimet olardy elge alyp keledi»,- dedi Aıbek Smadııarov.