SІM Ońtústik Koreıaǵa zańsyz kirgen eki qazaqstandyqtyń isine qatysty túsinik berdi

ASTANA. QazAqparat – Qazir Ońtústik Koreıaǵa zańsyz kirgen jerlesterimiz tergeý ızolıatorynda qamaýda otyr. Qazaqstannyń Ońtústik Koreıadaǵy elshiligi jergilikti quqyq qorǵaý organdary jáne ustalǵan qazaqstandyqtardyń týystarymen turaqty baılanysta. Tolyǵyraq Syrtqy ister mınıstrliginiń resmı ókili Aıbek Smadııarov aıtyp berdi, dep habarlaıdy QazAqparat tilshisi.

«2023 jylǵy 24 naýryzda Inchhon áýejaıynda pasporttyq baqylaý ótý barysynda Tashkentten kelgen 2 Qazaqstan azamatyna Ońtústik Koreıaǵa kirýge bas tartyldy. Olar deportatsııalaýdy kútý úshin arnaıy bólmege ornalastyrylǵan. Alaıda otandastarymyz túnde qashyp, Ońtústik Koreıa aýmaǵyna zańsyz kirgen. 26 naýryzda bir Qazaqstan azamaty ustaldy, al 29 naýryzda ekinshi qazaqstandyq kinásin moıyndap, polıtsııaǵa óz erkimen berildi»,- dedi Aıbek Smadııarov mınıstrlikte ótken brıfıngide.

Onyń aıtýynsha, qazir jerlesterimiz Inchhon qalasynda kóshi-qon ortalyǵyndaǵy tergeý ızolıatorynda qamaýda otyr.

«Ońtústik Koreıa eliniń zańnamasyna sáıkes, tergeý sharalary 3 aıǵa deıin sozylýy múmkin. Tergeý múddesi úshin Ońtústik Koreıanyń quzyretti organdary istiń egjeı-tegjeıin ashpaı otyr», - deıdi ol.

Sondaı-aq, SІM resmı ókili Koreıa Respýblıkasy aýmaǵyna zańsyz kirgen otandastarymyzǵa birneshe aıyptyń taǵylyp otyrǵanyn aıtty.

«Qazaqstannyń Ońtústik Koreıadaǵy elshiligi jergilikti quqyq qorǵaý organdary jáne ustalǵan qazaqstandyqtardyń týystarymen turaqty baılanysta. Esterińizge sala keteıik, Koreıa Respýblıkasynda jumys berýshi rásimdeıtin arnaıy ruqsat pen vızanyń bolýy negizinde ǵana jumys isteýge bolady. Jumysqa turýdyń basqa joldary zańsyz ekenin eskertemiz», - deıdi SІM resmı ókili.

Eske salaıyq, naýryzdyń sońynda eki otandasymyz Ońtústik Koreıaǵa kirýge tyıym salynǵanyna qaramastan atalǵan elge zańsyz kirip ketkeni týraly habarlaǵan edik.