SІM Ońtústik Koreıadaǵy qazaqstandyqtarǵa elge qaıtý jóninde keńes berdi

NUR-SULTAN. QazAqparat - Syrtqy ister mınıstrligi Ońtústik Koreıadaǵy qazaqstandyqtarǵa áýe reısteri qysqarmaı turyp elge kelýdi usyndy. Bul týraly brıfıngte QR SІM resmı ókili Aıbek Smadııarov aıtty, dep habarlaıdy QazAqparat.

«Keshe jarııalaǵanymyzdaı, áýe reısteri 1 naýryzdan bastap qysqarady. Qazaqstan azamattary shekteý qoıylǵanǵa deıin úıine jetip alǵany jón. Shekteý qoıylǵannan bastap reıster qysqarady. Sol kezde kelgisi keletinderge reıster qyzmet kórsete almaıdy. Olarǵa úshinshi memleket arqyly, bıletti basqa baǵada satyp alýǵa týra keledi», - deıdi Aıbek Smadııarov.

QR SІM azamattarǵa koronavırýs jaǵdaıy týraly habarlady.

«Bizdiń elshilik azamattarǵa Ońtústik Koreıadaǵy koronavırýs týraly habardar etý boıynsha birqatar sharalar qabyldady. Jedel shtab quryldy, messendjerde táýlik boıy baılanys telefony jumys isteıdi jáne kún saıyn azamattardy konsýldyq esepke tirkeý júrgizilip jatyr. Aýrý juqtyrǵandar men kóz jumǵandar sany ósýde, sol sebepti barynsha abaı bolý kerek. Koreıa ázirge jabylmaıdy, evakýatsııa týraly aıtýǵa áli erte. Jaǵdaıdy baqylaýda ustaımyz», - deıdi ol.

Biz buǵan deıin Ońtústik Koreıada 35 myń qazaqstandyq bar ekenin jazǵan bolatynbyz.