SІM ókili Japonııada krýız laınerinde bolǵan qazaqstandyqtar týraly aıtty

NUR-SULTAN. QazAqparat - QR Syrqy ister mınıstrliginiń resmı ókili Aıbek Smadııarov Japonııada Diamond Princess krýız laınerinde bolǵan qazaqstandyqtar týraly aıtty, dep habarlaıdy QazAqparat.

«Bizdiń azamattar sol laınerde bolǵanyn estigen sátte birinshi kúni-aq olarmen baılanys ornattyq. Eki áje men eki nemeresi ár 2-3 saǵat saıyn bizdiń konsýlmen baılanysqa shyǵyp otyrdy. Olar bortta birinshi testten ótti. Jaǵalaýǵa shyqqannan keıin ekinshi tekseristen ótti. Odan keıin Japonııanyń densaýlyq saqtaý mınıstrligi olarlyń densaýlyq jaǵdaıy jaqsy, aman-saý ekenin rastaıtyn qujat berdi», - deıdi Aıbek Smadııarov.

Olar elge oralǵanǵa deıin eki kún Tokıoda bolǵan.

«Odan keıin qatardaǵy jolaýshylar sııaqty bılet alyp, tirkelip, elge ushyp kelgen. Olardy osy jaqta karantınge jatqyzdy. Bul turǵyda QR Densaýlyq saqtaý mınıstrligin qoldaımyz. Olar aýrý oshaǵynan kelgendikten, saqtanǵan durys», - deıdi ol.

Buǵan deıin Diamond Princess laınerinde bolǵan qazaqstandyqtar karantınge jatqyzylǵanyn jazǵan bolatynbyz.