SІM: Germanııa – biz úshin Eýropa Odaǵyndaǵy negizgi strategııalyq seriktes

NUR-SULTAN. QazAqparat – QR Syrtqy ister mınıstriniń orynbasary Roman Vasılenko Qazaqstan úshin Germanııa Eýro Odaqtaǵy negizgi strategııalyq seriktes ekenin aıtty, dep habarlaıdy QazAqparat tilshisi.

«Búgin Qazaqstan-German Syrtqy ister mınıstrlikteri arasyndaǵy konsýltatsııalar barysynda ekijaqty yntymaqtastyqtyń mańyzdy aspektileri týraly mazmundy áńgime boldy. Jáne kún tártibindegi halyqaralyq ózekti máseleler boıynsha da pikir almastyq. Konsýltatsııalardyń ataýly kún aıasynda ótýiniń sımvoldyq máni bar. Búgin Qazaqstan men Germanııa dıplomatııalyq qatynastardyń ornaǵanyna 30 jyl tolýyn atap ótýde. Sonymen qatar, Germanııa delegatsııasy ótken jyldyń jeltoqsan aıynda Berlınde jańa koalıtsııalyq úkimet qurylǵan sátten bastap Qazaqstanǵa óziniń alǵashqy saıası saparyn júzege asyrýda», - dedi Roman Vasılenko QR SІM-de ótken baspasóz máslıhatynda.

Aıta ketsek, búgin elordaǵa GFR SІM-niń Shyǵys Eýropa, Kavkaz jáne Ortalyq Azııa elderimen yntymaqtastyq máseleleri jónindegi ýákili Mattıas Lıýtenberg bastaǵan delegatsııa keldi.

«Germanııa biz úshin Eýro Odaqtaǵy negizgi strategııalyq seriktes. GFR Qazaqstannyń táýelsizdigin alǵashqylardyń biri bolyp tanyp, dıplomatııalyq qarym-qatynas ornatty. 30 jyldyń ishinde ekijaqty yntymaqtast ilgeri damyp, joǵary deńgeıge jetti. Memleket basshysynyń Germanııaǵa jasaǵan sońǵy eki sapary ózara is-qımyldy jandandyrýǵa jaqsy serpin berdi. Dostyq jáne syndarly qarym-qatynastardy odan ári nyǵaıtýǵa Nur-Sultan men Berlınniń birqatar halyqaralyq máseleler, onyń ishinde kópjaqty qurylymdar jelisi boıynsha ustanymdarynyń uqsastyǵy da yqpal etetinine senimdimin», - deıdi ol.