SІM: Bıznes forým ótkizý – Aýǵanstannyń de-fakto úkimetin moıyndaý emes

ASTANA. QazAqparat – Astana Talıbandy moıyndaý máselesinde halyqaralyq qaýymdastyqtyń ustanymyn tolyqtaı qoldaıdy. Bul týraly Syrtqy ister mınıstriniń orynbasary Qanat Týmysh málim etti, dep habarlaıdy QazAqparat tilshisi.

«Osy forýmdy (Qazaqstan-Aýǵanstan bıznes forýmy) Qazaqstanda ótkizý týraly sheshim Aýǵanstannyń de-fakto úkimetin moıyndaý faktisi bolyp eseptelmeıtinin atap ótkim keledi. Bul máselede biz burynǵydaı Birikken Ulttar Uıymy Qaýipsizdik keńesiniń sheshimderin qatań ustanamyz. Talıbandy taný máselesinde eń aldymen, BUU Qaýipsizdik keńesiniń tıisti sheshimi shyǵý qajet ekendigine nazar aýdarýdy suraımyn», - dedi Qanat Týmysh Syrtqy ister mınıstrliginde ótken brıfıngte.

Onyń atap ótýinshe, BUU bul máselege qatysty Aýǵanstan bıligine birqatar talap qoıdy. Atap aıtqanda, ınklıýzıvtilik pen ókildikti qoldaý, terrorıstik uıymdarǵa óz aýmaǵyn qoldanýǵa jol bermeý, etnıkalyq azshylyqtar, áıelder men balalardy qosa alǵanda adam quqyqtarynyń saqtalýyn qamtamasyz etý qajet.

«Osyǵan baılanysty Talıbandy moıyndaý máselesinde Astana halyqaralyq qaýymdastyqtyń ustanymyn tolyqtaı qoldaıdy», - dedi Qanat Týmysh.