«Silk Way» telearnasy Ázerbaıjanda habar taratady

ASTANA. QazAqparat – Qazaqstan Respýblıkasy Prezıdenti Teleradıokesheniniń «Silk Way» halyqaralyq telearnasy Ázerbaıjan Respýblıkasy kabeldik televızııasynyń 14 operatorynyń arnalar paketine endi, dep habarlaıdy QazAqparat tilshisi.

Arna dırektory Erkejan Kúntýǵannyń sózinshe, Ázerbaıjan Aýdıovızýal keńesiniń qoldaýymen 15 mamyrdan bastap «Silk Way» telearnasy «K@TV1», «BAKTELECOM», «AZTELEKOM», «BİRLİK», «AZOL TV», «AZEUROTEL», «AZERİ TV», «BOSS GROUP», «GSP», «EUROSEL», «RAHAT TELECOM», «BEEONLİNE», «MEGALINK TV», «ODTV» abonentteri úshin qoljetimdi.

Buǵan deıin telearna synaq rejıminde habar taratty, operatorlar tehnıkalyq parametrlerin tekserip, Silk Way-di óz jelilerine qosýǵa daıyndaldy.

Basqa elderdegideı ázerbaıjandyq telekórermen kóp arnaly formatta usynylatyn orys, aǵylshyn, qazaq, qyrǵyz jáne ózbek tilderiniń birin tańdaı alady. «Silk Way» sıgnaly da Eutelsat Hot Bird 13 jáne Yamal 401 spýtnıktik platformalarynan jeke qabyldaý úshin qoljetimdi.

Eki el medıasynyń belsendi yqpaldastyǵyna bıyl sáýirde Ázerbaıjan Prezıdentiniń Qazaqstanǵa resmı sapary jańa serpin berdi. Memleket basshylary Qasym-Jomart Toqaev pen Ilham Alıev eki el halqynyń baılanysyn nyǵaıtýdaǵy qazaqstandyq jáne ázerbaıjandyq BAQ-tyń mańyzyn atap ótip, aqparat quraldary men medıa-óndiris salasyndaǵy seriktestikti damytýdy tapsyrdy.

Qazaqstan men Ázerbaıjan buqaralyq aqparat quraldarynyń tájirıbe, kontent almasý jáne ony birigip daıyndaý kezindegi ózara yqpaldastyǵy eki eldiń qarym-qatynasyn odan ári nyǵaıtýǵa septigin tıgizedi.

«Silk Way» telearnasy ázerbaıjandyq kórermenge otandyq avtorlyq baǵdarlamalar, derekti jobalar, sondaı-aq eń úzdik kórkem kontentti usynady.

Silk Way telearnasy – Qazaqstan Respýblıkasyndaǵy jalǵyz halyqaralyq telearna. Ol álemniń 118-den astam elinde kóp arnaly rejımde qazaq, orys, aǵylshyn, qyrǵyz jáne ózbek tilinde habar taratady.