Sıdneıge kelip toqtaǵan krýız laınerindegi 800 týrısten koronavırýs tabyldy

ASTANA. QazAqparat – Sıdneı portyna kelip toqtaǵan Majestic Princess krýızdik laınerindegi shamamen 800 jolaýshydan koronavırýs anyqtaldy. Kemede jalpy 3 myńnan astam jolaýshy men 1 myń ekıpaj múshesi bar. Bul týraly QazAqparat Aýstralııadaǵy ABC korporatsııasynyń senbi kúngi málimetine silteme jasaı otyryp habarlady.

Carnival Australia operator kompanııasynyń deregi boıynsha, ınfektsııa juqtyrǵandardyń basym bóligi – jolaýshylar, olar óz kaıýtalarynda oqshaýlanǵan.

Krýız 12 kúnge sozyldy. Aýrý orta jolǵa kelgende órshı bastaǵan.

ABC habarlaýynsha, Aýstralııanyń Jańa Ońtústik Ýels shtatynyń densaýlyq saqtaý departamenti laınerde COVID-19 taralýyna baılanysty eskertý jarııalanǵanyn rastady.

2020 jyly naýryzda Aýstralııa porttarynda pandemııaǵa baılanysty krýızdik laınerlerge toqtaýǵa jáne turýǵa tyıym salynǵan bolatyn.

Oǵan Ruby Princess kemesindegi oqıǵa sebep boldy. 2020 jyly naýryzda osy keme ekıpajy borttaǵylarda vırýs baryn jasyryp qalǵan edi.

Jolaýshylar jaǵaǵa shyǵyp, úılerine tarap ketti. Sonyń saldarynan 600-den astam adam koronavırýs juqtyryp, onyń 28-i kóz jumdy.

Aýstralııa men Jańa Zelandııa tergeý júrgizip, onyń nátıjesinde Jańa Ońtústik Ýels shtatynyń densaýlyq saqtaý departamenti qyzmetkerleri kináli dep tanylǵan edi.

Krýız laınerleriniń toqtaýyna tyıym 18 sáýirde alynyp tastaldy, biraq alǵaşqy laıner krýızge tek 1 maýsymda shyqty.

Foto: AP Photo/ Mark Baker