«Sybaǵa» festıvali: Aqtóbede qolóner sheberleri men etnodızaınerler bas qosty
Sharanyń saltanatty ashylýynda óńir basshysy Ashat Shaharov sóz sóılep, festıvaldiń mańyzdylyǵyna toqtaldy. Óz sózinde ol Memleket basshysynyń Ulttyq quryltaıda aıqyndap bergen elimizdiń mańyzdy ıdeologııalyq tujyrymdary men negizgi baǵyttaryn atap ótip, «Sybaǵa» festıvali ulttyq dástúrlerdi dáripteýge aıyryqsha úles qosady dedi.
– Prezıdent Qasym-Jomart Kemeluly Ulttyq quryltaıdyń úshinshi otyrysynda ultymyzdyń jańa kelbetin aıqyndaıtyn negizgi qundylyqtardy aıtty. Onyń ishinde táýelsizdik pen otanshyldyqtan bastap, zańdy saqtaý men tártip te bar. Osy ıdeıalyq negizderdi basshylyqqa alsa, elimiz boljaýsyz jáne qarqyndy damyp kele jatqan HHІ ǵasyrda álemde laıyqty ornyn tabatyndyǵyna senimin bildirdi. Salt-dástúr – adamzat úshin ilgerileýdiń sarqylmas qaınar kózi. Óńirimizde tuńǵysh ret, bir apta kóleminde «Sybaǵa» ulttyq dástúrler festıvalin ótkizip jatyrmyz. Biz jastarǵa, óskeleń urpaqqa babalar salǵan sara joldan ajyramaý úshin dástúrimiz ben saltymyzdy saralap, ozyq úlgilerdi úzdiksiz dáripteý, daǵdyǵa aınaldyrýdy maqsat ettik. Festıval bes kúnge sozylady. Ár kúni ulttyq rýhanı qundylyqtardy nasıhattaýǵa arnalǵan arnaıy is-sharalar uıymdastyrylady. Sońyn qaıyrymdylyq aktsııasymen aıaqtalaýdy josparlap otyrmyz, - dep atap ótti Ashat Shaharov.
Ulttyq naqyshta bezendirilgen Óner ortalyǵynda aqtóbelik qolóner jáne tigin sheberleri, zergerler qaz-qatar tizilip, kórme-jármeńkede saýdalaryn qyzdyrdy. Qazaqtyń oıý-órnegimen kómkerilgen túrli áshekeı buıymdar, kórpe-jastyqtar, ulttyq kıimder kózdiń jaýyn alady. Ár sheberdiń qolynan avtorlyq týyndylarmen oblys ákimi jeke-jeke tanysyp shyqty. Kórme-jármeńkege 50-ge jýyq qolónershi shaqyrylǵan.
Sondaı-aq, shara aıasynda aqtóbelikterge sheberlik saǵattary ótkizildi. «Zerleý jáne qoldanbaly óner» taqyrybynda Aıjan Abdýbaıtova (Almaty q.), jadaǵaılar týraly «Mańǵystaý munarasynyń» jetekshisi Aıjan Sembıǵalıeva (Aqtaý q.), ulttyq kıimder mańyzdylyǵy jaıly Bulbul Kápqyzy dáris oqydy jáne zergerlik buıymdardy jasaýdyń qyr-syryn aqtóbelik zerger Bolat Atyraýbaev aıtyp berdi.
Festıvaldiń ekinshi bóligi «Dáýir defılesi» ulttyq kıimder sán kórsetilimimen jalǵasty. Onda Aqtóbemen qatar, Almaty, Aqtaý jáne Shymkent qalalarynan kelgen otandyq dızaınerler ulttyq naqyshtaǵy toptamalaryn kópke kórsetti.
Kıimderge qazaq halqynyń oıý-órnekteri, tabıǵı materıaldar jáne dástúrli pishimder erekshe úılesimmen qoldanylǵan. Áıelderdiń áshekeı buıymdarymen tolyqtyrylǵan kamzoldary, erlerge arnalǵan shapan men tymaqtar, sondaı-aq zamanaýı úlgide beıimdelgen etnostıldegi kóılekter kórermender yqylasyna ıe boldy.
Aıtyp ótý kerek, «Sybaǵa» festıvali oblys ortalyǵy men barlyq 12 aýdanda ótkizilip jatyr.