Sıanda QR Táýelsizdiginiń 26 jyldyǵyna marapat tabystaý rásimi ótti

BEIJІŃ-SIANЬ. QazAqparat - Qytaıdaǵy Qazaqstandyq stýdentter qaýymdastyǵynyń Sıan bólimshesi (KSAC) Qazaqstan Respýblıkasy Táýelsizdiginiń 26 jyldyǵyna oraı QHR Shensı provıntsııasy Sıan qalasynda merekelik kontsert ótkizdi, dep habarlaıdy Qytaıdaǵy «QazAqparat» HAA menshikti tilshisi.

Іs-shara 17 jeltoqsanda 150 qazaqstandyq stýdenttiń qatysýymen ótti.

KSAC-tyń atynan Táýelsizdiktiń 26 jyldyǵyna oraı jáne qazaqstandyq stýdentterdiń ómirindegi ózekti máselelerdi sheshýge qosqan úlesi úshin Qytaıdaǵy QR elshiligi konsýldyq bóliminiń meńgerýshisi Bolat Syrlybaev, Sıan kólik ýnıversıteti Jibek jolynyń Ekonomıkalyq beldeýi Innovatsııalyq ortalyǵy janyndaǵy Ortalyq Azııa quqyq ǵylymı ortalyǵynyń dırektory Sofııa Ýshýrova, sondaı-aq qazirgi ýaqytta Sıan shet tilder ýnıversıtetinde qazaq tili kafedrasynda jumys isteıtin L.N.Gýmılev atyndaǵy EUÝ oqytýshysy Gúlaıym Ospanqulova marapattaldy.

Keshte ońtústikkoreıalyq ánshi Tak Joo Yoo «Kózimniń qarasy» ánin shyrqady. Respýblıkalyq jáne halyqaralyq festıvalderdiń laýreaty Nurbol Sadyqov «Aqqý» kúıin shertip, «Popýrrı» oryndady.

«Bizdiń elimiz álemdik deńgeıde joǵary bedelge ıe boldy. Stýdentterimiz  elimizdi maqtan tutyp, birlik pen yntymaqqa umtylǵandaryn qalaımyz. Bizdiń ortaq úıimizde beıbitshilik pen kelisim nyǵaıa bersin», - dedi KSAC Sıan bólimshesiniń tóraıymy Nurgúl Maqulbek QazAqparatqa bergen suhbatynda

Eske salaıyq, Qytaıdyń Beıjiń, Shanhaı, Úrimji, Sıan jáne basqa da qalalarynda Qazaqstannyń Táýelsizdik kúnin merekeleýge baılanysty aýqymdy sharalar ótip jatyr.