Sı Tszınpın Qytaıdyń elimizge eshqashan zııanyn tıgizbeıtinin aıtty — Prezıdent

<p>ASTANA. KAZINFORM &mdash; Memleket basshysy Qasym-Jomart Toqaev &laquo;Ana tili&raquo; gazetine bergen <a href="https://kaz.inform.kz/news/kasim-zhomart-tokaev-maksatim-ekonomikani-zhane-egemendkt-nigaytu-1a9c27/" target="_blank" rel="noopener">suhbatynda</a> Qytaı Halyq Respýblıkasynyń Tóraǵasy Sı Tszınpınniń elimizge jasaǵan memlekettik sapary barysyndaǵy kelissózderdiń basty nátıjesine toqtaldy.</p>

— Qytaı Halyq Respýblıkasynyń Tóraǵasy Sı Tszınpınniń elimizge jasaǵan memlekettik sapary ótken jyldyń taǵy bir mańyzdy oqıǵasy boldy. Sondaǵy kelissózderdiń basty nátıjesi qandaı? Aqparat quraldarynda Tóraǵa Sı ekeýińizdiń el úkimetterine ózara saýda aınalymyn eki ese arttyrý jóninde mindet júktegenderińiz aıtyldy. Bul qol jetkizýge bolatyn meje me?

— Qytaı Halyq Respýblıkasynyń Tóraǵasy Sı Tszınpınniń bizdiń eldi jaqsy biletinin, qazaq halqyna iltıpatpen qaraıtynyn atap ótken jón. Biz eki jaqty qarym-qatynasqa, óńirlik jáne halyqaralyq ahýalǵa qatysty barlyq máseleni emen-jarqyn talqyladyq. Eshqandaı kózqaras qaıshylyǵy joq. Qytaı úshin Qazaqstan — asa mańyzdy strategııalyq seriktes. Qarqyndy ári jan-jaqty damyp kele jatqan qazaq-qytaı yntymaqtastyǵy, shyn máninde, máńgi strategııalyq seriktestik deńgeıine jetti. Munyń Qazaqstan múddesine saı keletini sózsiz.

Qazaqstanǵa jasaǵan memlekettik sapary kezinde Tóraǵa Sı Tszınpın Qytaıdyń elimizge eshqashan zııanyn tıgizbeıtinin, bizdiń egemendigimiz ben táýelsizdigimizdi barynsha qoldaıtynyn atap ótti. Bul — óte mańyzdy málimdeme.

2023 jyly Qazaqstan men Qytaı arasynda ózara vızasyz rejım ornatyldy. Jańa bastama alys-beristi damytýǵa jáne eki halyqtyń dostyǵyn nyǵaıtýǵa oń áserin tıgizip jatyr. Qazaqstan azamattary Qytaıdy jańa qyrynan tanyp, onyń tehnologııalyq turǵydan alyp memleketke aınalǵanyna kóz jetkize bastady. Qytaı jurty da bizdiń otandastarymyzǵa dostyq peıil tanytyp otyr.

Qytaımen jan-jaqty yntymaqtastyqty odan ári damytý qazaq dıplomatııasyndaǵy mańyzdy mindettiń biri bolyp qala beredi. Bul memleket — Qazaqstannyń negizgi saýda seriktesi, sondaı-aq ekonomıkamyzdaǵy eń iri ınvestordyń biri. Ózara saýda aınalymyn eki ese arttyrýǵa barlyq múmkindik bar. Eń bastysy, eki el basshylarynyń saıası erik-jigeri jetkilikti. Sondyqtan atalǵan maqsatqa jetýge ábden bolady.

Joǵary deńgeıdegi dıalog 2025 jyly da jalǵasady. Tóraǵa Sı Tszınpın «Ortalyq Azııa — QHR» sammıtine qatysady dep josparlanyp otyr. Onyń Qazaqstanǵa aldaǵy sapary, sondaı-aq bıyl kúzde Qytaıda ótetin kelissózder eki eldiń san salaly yqpaldastyǵyn odan ári nyǵaıtýǵa septigin tıgizedi dep senemin.