ShYU Syrtqy ister mınıstrleri pandemııa jaǵdaıyndaǵy yntymaqtastyqty talqylady

MÁSKEÝ. QazAqparat – Búgin Qazaqstan Syrtqy ister mınıstri Muhtar Tileýberdi Reseı Federatsııasynyń tóraǵalyǵymen ótken Shanhaı yntymaqtastyq uıymyna (ShYU) múshe memleketterdiń Syrtqy ister mınıstrleri keńesiniń kezekti otyrysyna qatysty. Bul is-shara ShYU elderi SІM basshylarynyń COVID-19 pandemııasy bastalǵannan keıingi alǵashqy kezdesýi boldy, dep habarlaıdy QazAqparat.

Іs-sharanyń negizgi maqsaty – ShYU-ǵa múshe Memleketter basshylary keńesi otyrysynyń mazmundyq bóligin daıyndaý. Atap aıtqanda, ShYU Sammıtiniń kún tártibi men birqatar qorytyndy qujattarynyń jobalary qaraldy jáne jalpy kelisildi.

«ShYU elderiniń syrtqy saıası vedomstvolarynyń basshylary halyqaralyq jáne óńirlik kún tártibindegi eń ózekti máseleler boıynsha syndarly pikir almasyp, ShYU-ǵa múshe memleketterdiń jańa koronavırýs ınfektsııanyń pandemııasy jaǵdaıyndaǵy yntymaqtastyǵyn talqylady.

Mınıstrler qazirgi zamanǵy memleketaralyq qatynastar júıesiniń yqpaldy qatysýshylarynyń biri bolyp tabylatyn jáne aımaqtaǵy qaýipsizdik pen turaqtylyqty saqtaýǵa aıtarlyqtaı úles qosatyn Uıymynyń róli men ornyn odan ári arttyrýdy kelisti.

ShYU-ǵa múshe memleketterdiń dıalog boıynsha baıqaýshylar jáne áriptestermen ózara tıimdi yntymaqtastyǵyn damytýdyń, sondaı-aq ShYU-nyń halyqaralyq jáne óńirlik uıymdarmen ózara is-qımylyn jolǵa qoıýdyń mańyzdylyǵy atap ótildi», - delingen QR Syrtqy ister mınıstrliginiń aqparatynda.

Shanhaı yntymaqtastyq uıymy 2001 jyly quryldy. Uıym músheleri - Qazaqstan, Úndistan, Qytaı, Qyrǵyzstan, Pákistan, Reseı, Tájikstan jáne Ózbekstan. ShYU baqylaýshylary: Aýǵanstan, Belarýs, Iran jáne Mońǵolııa. ShYU dıalogy boıynsha seriktester: Armenııa, Ázerbaıjan, Kambodja, Nepal, Túrkııa jáne Shrı-Lanka.