ShYU sammıtinde qol qoıylatyn qujattar bekitildi

ASTANA. QazAqparat - Shanhaı yntymaqtastyq uıymyna múshe memleketter Syrtqy ister mınıstrleriniń kezekti otyrysynyń qorytyndysynda 8-9 maýsymdaǵy Astana sammıtinde qol qoıylatyn qujattar bekitildi. Bul týraly otyrystan keıingi brıfıngte QR Syrtqy ister mınıstri Qaırat Ábdirahmanov málim etti, dep habaralıdy QazAqparat.

«Kezdesý dástúrli dostyq pen ózara túsinistik sarynda ótti. Májiliste biz osy jyly 8-9 maýsymda Astanada josparlanǵan ShYU-ǵa múshe memleketter basshylarynyń keńesi mazmunyn ázirleý barysyn talqyladyq. Budan basqa uıymnyń qazirgi jaǵdaıy jáne ózekti máseleler boıynsha pikir almastyq. Sondaı-aq aldaǵy ózara árekettestik pen yntymaqtastyqtyń jańa kókjıekterin anyqtaýǵa kúsh saldyq. Bul máselelerdiń kóbisi ShYU sammıtinde qabyldanatyn Astana deklaratsııasynda kórinis tabady. Búgingi jıynda biz sammıttiń kún tártibin jáne qol qoıylatyn ózge de qujattar jobalaryn da qarastyryp, kelistik. Olardyń arasynda Úndistan men Pákistannyń uıym músheligine qabyldaný rásiminiń aıaqtalýy jáne múshe memlekettiń mártebesin berý týraly sheshim mańyzdy qujattardyń biri bolmaqshy. Basqa sózben aıtqanda bıyl 9 maýsymda Astanada ótetin múshe memleketter basshylarynyń bas qosýynda Úndistan pen Pákistannyń ShYU-ǵa tolyqqandy múshe retinde kirýi úshin sońǵy da mańyzdy qadam jasaldy», - dedi mınıstr.

Munan basqa onyń aıtýynsha, jańa eki eldiń ShYU-nyń quramyna enýine baılanysty múshe memleketterdiń úlestik jarnalary, týrızm salasyndaǵy yntymaqtastyqty kúsheıtý jáne uıymnyń jalpy ınstıtýttyq damýyna baǵyttalǵan basqa da qujattar qarastyrylyp, ShYU-nyń sammıtinde qol qoıý úshin bekitildi.

«Jalpy búgin ótkizilgen otyrysta meniń áriptesterim ShYU-nyń halyqaralyq jáne óńirlik qaýipsizdikti qamtamasyz etetin, ekonomıkalyq jáne mádenı-gýmanıtarlyq ózara árekettestiktiń damýyna úles qosatyn mańyzdy halyqaralyq faktor retinde qalyptasqanyn erekshe atap ótti»,- dedi Ábdirahmanov.