ShYU-ǵa múshe memleketter basshylarynyń sammıti qarasha aıynda beınekonferentsııa formatynda ótedi
Qazaqstandyq taraptan sharaǵa Qazaqstan Respýblıkasynyń Syrtqy ister mınıstri Muhtar Tileýberdi qatysty.
ShYU SІMK otyrysynyń qorytyndysy boıynsha ótken baspasóz konferentsııasynda Reseı SІM basshysy Sergeı Lavrov taraptar ShYU-ǵa múshe memleketterdiń aldaǵy sammıtine qujattardy daıyndaý barysyn talqylaǵanyn, sondaı-aq halyqaralyq jáne óńirlik kún tártibindegi birqatar ózekti máseleler boıynsha keńes ótkizgenin habarlady.
«Biz qosymsha qadamdardy qajet etetin yntymaqtastyq baǵyttaryn qarastyrdyq. Olardyń qatarynda halyqaralyq terrorızmge, esirtkiniń zańsyz aınalymyna, transshekaralyq uıymdasqan qylmysqa jáne kıberqylmysqa qarsy kúreste kúsh-jigerdi biriktirý máseleleri bar. Barlyq osy baǵyt boıynsha memleket basshylarynyń bekitýine usynylatyn ótinishter men basqa da qujattardyń jobalary maquldandy», - dep atap ótti ol.
S.Lavrov sondaı-aq Aýǵanstan boıynsha, Sırııa máselesin retteý boıynsha, Taıaý Shyǵys pen Afrıkanyń soltústigindegi birqatar máseleler boıynsha taraptar pikir almasqanyn aıtty.
«Bizde AQSh-tyń Irannyń ıadrolyq baǵdarlamasyn retteý jónindegi birlesken keshendi is-qımyl josparynan shyǵýy tóńireginde qalyptasqan jaǵdaı boıynsha ortaq ustanym bar», - dep atap ótti S.Lavrov.
Sondaı-aq, taraptar ShYU-nyń 2035 jylǵa deıingi kópjaqty ekonomıkalyq damý baǵdarlamasyn iske asyrýdaǵy mańyzyn atap ótti. Ózara kóliktik baılanys, ózara eseptesýde ulttyq valıýtalarǵa kóshý, saýda men ınvestıtsııa úshin ashyq jaǵdaı jasaý máseleleri qaraldy.
Reseı SІM basshysy ShYU-ǵa múshe memleketter basshylarynyń qatysýymen ótetin sammıt osy jyldyń qarasha aıynda beınekonferentsııa formatynda ótetinin habarlady. Osydan keıin uıymǵa tóraǵalyq etý Tájikstanǵa ótedi.