ShYU Beıjińde Naýryzdy atap ótti

BEIJІŃ. QazAqparat - 21 naýryz kúni Shanhaı yntymaqtastyq uıymynyń (ShYU) hatshylyǵy Ulystyń uly kúni - Naýryzǵa arnalǵan saltanatty shara ótkizdi, dep habarlaıdy «QazAqparat» HAA-nyń Qytaıdaǵy menshikti tilshisi.

Sharaǵa elshiler, QHR-da akkredıttelgen dıplomatııalyq mıssııalar ókilderi, belgili qoǵam qaıratkerleri, ǵalymdar, jýrnalıster, bıznes ókilderi, jalpy 400-den astam adam qatysty.

Bıylǵy Naýryzǵa arnalǵan merekelik sharanyń bir ereksheligi, oǵan 2017 jyldyń maýsymynda Astanada ótken ShYU Sammıtinde Uıymnyń tolyq músheligine qabyldanǵan Pákistan men Úndistan ókilderi alǵash ret qatysty.
 

Merekemen quttyqtaǵan ShYU Bas hatshysy Rashıd Alımov úsh myń jyldan beri Naýryz Jer betindegi mıllıondaǵan adamnyń súıikti meıramy retinde toılanatynyn aıtty.

«Naýryz adamdardy tabıǵatpen úndes ómir súrýge baýlyp, qaıyrymdylyq, meıirimdilik, dostyq pen yntymaq, gúldengen bolashaq qurý ıdeıalaryn nasıhattaıdy, bul «Shanhaı prıntsıpterine» de tolyǵymen sáıkes keledi», - dedi ol.
 

Bas hatshynyń osy sózine vıdeo arqyly quttyqtaǵan ShYU-ǵa múshe memleketterdiń QHR-daǵy elshileri, QHR úkimetiniń ShYU-daǵy arnaýly ókili, ShYU Hatshylyǵynyń ujymy da qosyldy.

Sharada qonaqtarǵa 2017 jylǵy 31 jeltoqsan kúni Kýnmın qalasynda (QHR, ıÝnnan provıntsııasy) ótken ShYU halyqaralyq marafonynyń fotokórmesi, ulttyq qoldanbaly óner týyndylarynyń kórmesi usynyldy.